Guard house sa junkshop na-ugdaw | SunStar

Guard house sa junkshop na-ugdaw

Time to read
less than
1 minute
Read so far

Guard house sa junkshop na-ugdaw

Saturday, August 12, 2017

SWERTENG daling natabang sa tinugyanan sa Bureau of Fire and Protection (BFP) ang kalit nga pag-ulbo sa kalayo Sabado sa buntag, Agosto 12, sa usa ka junkshop nga anaa sa Barangay Puntod, dakbayan sa Cagayan de Oro.

Ang junkshop giingong gipanag-iyahan sa usa ka Alfredo Ramirez diin nagtapun-og ang mga lata, karton ug mga plastik.

Sa pakighinabi sa SunStar SuperBalita kang Ronald Aberilla, usa ka basurero, nga nakurat na lamang sila sa dihang adunay kalit nga misila sa guard house nga bahin hinungdan nga dali usab kini silang mikaratil og dagan dayong tawag sa bombero.

“Murag wire siguro to’ng nasunog, kuryente, kanang diha sa may tangke ba, nisiga ra’g kalit, nanagan dayon mi kay basig mobuto ang tangke,” pahayag ni Aberilla.

Samtang gibutyag usab sa usa ka trabahante sa junkshop nga natingala na lamang sila nga kalit nga nawala ang kuryente ug sa paggawas niini dako na ang dilaab sa kalayo.

Nasayran nga maayo na lamang nga dali kining natabang gumikan na usab kay duol ra kaayo ang tangke sa giingong krudo sa guard house diin nagsumikad ang pag-ulbo sa kalayo.

Sa pagsulat niini nga balita gisuta pa sa tinugyanan sa BFP ang hinungdan sa kalit nga pag-ulbo sa kalayo lakip na ang damyos sa maong natigayong sunog.

Gipatik sa mantalaang Superbalita Cagayan de Oro Agosto 13, 2017.

View Comments