13-anyos gi-gang rape patay | SunStar

13-anyos gi-gang rape patay

Time to read
1 minute
Read so far

13-anyos gi-gang rape patay

Sunday, August 13, 2017

DILI tiaw ang kamatayon sa 13-anyos nga dalagita human gitabangan og lugos ug gipatay sa mga suspek nga giingong kanhi tokhang surenderee sa lungsod sa Naawan, Misamis Oriental.

Si Police Senior Inspector Jay Francis Estigoy, hepe sa Naawan Police Station, mibutyag sa SuperBalita Cagayan de Oro nga ang biktima, nga itago na lamang sa ngalan nga Jessa, ang anaa na sa puloy-anan niadtong gabii sa Agusto 10.

Kalit niabot ang duha ka lalaki ug miingon nga pagawason si Jessa kay adunay magpatutor niini hinungdan niuban sab dayon ang biktima.

Apan ang amahan ni Jessa nabalaka na og maayo tungod kay mga alas 10:00 kapin sa gabii wala na makauli iyang anak hinungdan nagpatabang kini sa kapolisan.

Tungod kay ulan niadtong tungora nagbahin ang mga polis nga pangitaon ang biktima ug didto nakita sa kanipaan nga bahin nga wala nay panimout. Walay sapot ang ubos nga parte ni Jessa ug t-shirt lamang ang nabilin, namatikdan sab nga gibundakan og gahi nga butang ang biktikma ug gibunal pa kini sa punoan sa lubi ug gituok.

Gisuwayan og dala sa kapolisan ang biktima sa Manticao Provincial Hospital apan dead on arrival kining gideklarar sa mga doktor.

Matod ni Estigoy nga mga 30 minutos gikan napalgan ang biktima ilang nadakpan ang duha sa mga suspetsado nga diay kanhi mga tokhang surenderee, nag edad ug 19 anyos ug 17 anyos ug susama lamang ang barangay nga gipuy-an sa biktima.

Giingon sab sa mga residente nga daan na adunay dako og gusto ngadto kang Jessa kining duha ka mga suspetsado ug gitouhang giplano kini ngadto sa biktima.

Sa pagsusi sab sa mga doktor sa biktima positibo kining gilugos.

Giklaro sab ni Estigoy nga wala nila gidugay ang request sa Scene of Crimes Operatives (Soco) nga ipaubos kini sa otopsiya tungod kay ila deretsong gitawagan ang Soco apan lamang dili available niadtong tungora. Gipasabot sab nga mahimo gihapon i otopsiya ang patayng lawas taliwala human na gibalsamar.

Daw sukwahi sa mga nanggawas nga report gibutyag ni Estigoy nga gihimo sa kapolisan sa Naawan ang insakto nga proseso ug wala nagpasagad.

Gikatakdang ang biktima mapailawom sa otopsiya karong adlawa samtang ang mga suspetsado gikatakdang pasakaan og kasong rape with homicide. Lakip ang pagpaubos sa drug testing.

Ang mga suspek detinado na karon sa prisuhan sa Naawan Police Station kinsa mihimakak sa krimen. Lakip sa gihimong lakang sa kapolisan ning panahona ang pagpangita sa giingong laing duha ka mga kauban nga misibat human sa insidente.

Gipatik sa mantalaang Superbalita Cagayan de Oro Agosto 14, 2017.

View Comments