500 ka indibidwal namakwit pagsaka sa Iponan River

MOABOT sa 500 kapin ka indibidwal gikan sa Barangay Iponan ug Canitoan ang namakwit tungod sa abnormal nga pagsaka sa lebel sa tubig sa Iponan River niadtong Lunes sa gabii ning siyudad sa Cagayan de Oro.

Si Monette Sagrado, kinsa personahe sa City Disaster Risk Reduction Management Council (CDRRMC), nibutyag nga basi sa ilang monitoring, adunay kusog kaayo nga pag-ulan sa Barangay Pigsag-an sa ibabaw nga bahin hinungdan misaka ang tubig baha sa Iponan River.

Walay bagyo nga namonitor apan naapektuhan ang maong area sa localized thunderstorm.

Ang mga bakwit nagsilong sa ilang nagkadaiyang covered court sa ilang barangay.

Tungod sa namonitor sa CDRRMC mga alas 11:00 pa sa gabii, giabisohan na nila ang taga-Iponan nga magbinantayon tungod sa pagsaka sa tubig sa kasubaan.

Hinuon kagahapong adlawa namalik ra usab ang mga bakwit sa ilang tagsa tagsa ka puloy-anan gumikan nibalik naman sab sa normal ang tubig sa suba.