NIDAGSA ang mga residente sa buhatan sa kapolisan human nga nabalaka sa dihang gisulayan pagsunog ang ilang mga balay mga alas 3 sa kaadlawon, Lunes, Agosto 28, sa Osmeña Extension, Barangay 22, dakbayan sa Cagayan de Oro.
Nagpatala ang ubay-ubay ka mga residente batok kang Loreto Rafols, 56, minyo, taga Barangay 22 ning dakbayan.
Sa nahipos nga impormasiyon gikan sa kapulisan sa Police Station 3 (PS3) sa Agora, gikabutyag nga padayon pa ang ilang pagpangita sa suspek human nga dali usab kining nakasibat.
Nasayran nga maayo na lamang nga namatikdan ang suspek human nga misulay kini sa pagsunog sa mga balay pinaagi sa pag-itsa og cellophane nga adunay gas.
Narekober sa mirespondeng kapulisan ang Fubu brand nga green nga jacket nga adunay hood nga giingong gisuot sa maong suspek diin gikabutyag nga nakuhaan kini sa closed-circuit television camera.
Gisuta pa ang motibo sa suspek sa pagsulay og sunog sa dapit.
Sa pagsulat niini nga balita, padayon pa ang kapolisan sa follow-up operation aron nga masikop ang suspek.