GIKLARO ni Dr. Perla Asis, sa City Veterinary Office ning dakbayan sa Cagayan de Oro, nga walay pagsaka sa kaso sa rabbies ning dakbayan.
Kini sukwahi sa unang nigawas nga taho ning mantalaan nga dunay pagsaka sa ihap sa kasong rabbies sa dakbayan.
Si Asis nga nahinabi sa SunStar SuperBalita niingon nga mas niubos pa gani ang ihap sa rabbies karong tuiga kong itandi sa miaging tuig.
Matud ni Asis nga dunay pagsaka sa dog bites kon mga tawo napaakan sa iro apan wala kini nagpasabot nga ang maong mga napaakan nagpositibo sa rabbies.
Tungod niini, aron mas maubsan pa gayud ang kaso sa rabbies sa dakbayan giawhag sa City Veterinary Office ang responsabli nga pagpamuhi og mananap.
Kong dunay mga binuhi nga mananap sama sa iro angay gyud kini mga atimanon og maayo pinaagi sa pagpa-ubos niini sa insakto nga bakuna. (JLB)