ANG buhatan sa Provincial Agriculture Office sa Misamis Oriental (Mopao) nipagawas og mokantidad P58 million nga proyekto alang sa mga mag-uuma sa probinsya sa Misamis Oriental diin 800 kapin ka mag-uuma ang nakabenipisyo.
Si Mopao chief Dr. Benjamin Resma nibutyag nga mobalor sa P39 million ang kantidad nga gikan sa Provincial Government ug P19 million ang gikan sa National Government’s General Appropriations Act alang sa nagkadaiyang proyekto.
Gipasabot ni Resma nga kini nga proyekto alang sa mga mag-uuma sama sa pagpang-apod og sinako nga bugas, mais, lagutmon ug ingon man cacao seedlings nga gi-partner sa Philippine Coconut Authority.
Gawas niini, miapod sab sila og tilapia fingerlings para sa fishery production, paghatag og molasses alang niadtong mga mag-uuma nga mas nagpokos og organic farming.
Aron usab sayon lamang sa mga mag-uuma sa Misamis Oriental ang ilang pag-uma mitunol usab ang buhatan og mga irrigation facilities, machineries ug ekipo sama sa pumps ug engines, knapsack sprayer, fish landings, bottom set gill nets, squid jigger fish stalls, fiber glass boat engines, ug payaw.
Ang Mopao nihatag sab og nagkalain-laing training ngadto sa mokabat 879 ka mga mag-uuma sa nagkadaiyang lungsod aron mas madugangan ang kahibalo nila sa pag-atiman sa ilang umahan hilabina ang mga teknik sa rice ug corn production.
Tungod sa kalamboan sa Mopao dako ang pahalipay ug pasidungog ang gihatag ni Misamis Oriental Governor Yevgeny Vincente Emano tungod kay daw mas gipalambo ni Resma ang estado sa mga mag-uuma denhi sa probinsya. (SVB)