TUBOD, Lanao Del Norte –- Patay ang lima ka bulan nga bata ug ang inahan ug amahan niini human sa giingong lihitimong operasyon sa kapolisan niaging adlaw sa mga alas 4:00 sa kadlawon sa P-6, Barangay Taguranao.
Ang operasyon gikasa sa Tubod Police Station, Special Weapons and Tactics ug laing unit aron iimplementar ang warrant of arrest sa kasong frustrated murder batok sa usa ka Bevino Laride alyas Junjun ug Jonel Ocana Laride, hingkod ang edad, residente sa dapit.
Ang mga suspek adunay standing warrant alang sa kasong attempted murder nga giisyu sa abugado nga si Judge Dennis Vicoy.
Atol sa pagsilbi sa warrant giingong wala ang akusadong si Jonel ug ang nahibilin si Bevino Laride lamang.
Daw samtang paingon na sa puloy-anan niini ang kapolisan kalit kining nagpabuto sa armas ug namusil hinugdan samaran ang sakop sa pwersa sa kapolisan nga giiilang si Police Officer 1 Yasser Macatbar.
Kini ang giingong rason nganong mibalos og pusil ang mga polis nga miresulta sab sa pagkaigo ni Bevino ug nalakip pa ang iyang kapuyo nga si Virginia Delibo ug ilang lima ka bulan pa lamang nga anak nga lalaki nga anaa sulod sa puloy-anan ug pulos dead on the spot.
Ang polis nga samdan gidala na karon sa Mercy Hospital sa dakbayan sa Iligan.
Narekober sab sa crime scene ang M2 carbine rifle nga gamit sa suspetsado nga unang namusil.
Ang maong insidente naghatag usab og sobrang kasuko sa pipila ka mga residente sa dapit ug ingon man diha sa social media giingong usa ka masaker ang gihimo sa mga polis.
Ang kapolisan sa Lanao nagpadala og pamahayag nga lehitimo ang operasyon ug dili kini masaker.
"The PNP personnel in Lanao del Norte, were conducting police operation by serving the Search Warrant and during the operation, the PNP (Philippine National Police) personnel were fired upon by the suspect which resulted to one PNP person Wounded In Action and which prompted the operating personnel to fired upon. There was already an imminent threat to life to the PNP person on the ground and there is no other option but to use force to subdue the suspect," pamahayag sa kapolisan.