Kapulisan misiguro makakuha og report ang mga media

GIKLARO sa kapulisan nga walay kamatuoran ang mga nigawas sa social media nga dili na mahimong makakuha og report ang mga sakop sa media gikan sa police blotter ug mga spot report sa kapulisan basi sa mando ni Police Director General Ronald Bato Dela Rosa.

Si Police Superintendent Lemuel Gonda, tigpamaba sa Police Regional Office(PRO)-Northern Mindanao, miingon nga niadtong Huwebes sa hapon, Septembre 14, nakadawat sila og memorandum gikan mismo sa Campo Crame kalabot sa mikatap nga report nga dili na maka-access ang mga sakop sa prensa sa ilang mga operasyon ug mga report.

Sa sulat pamahayag gikan mismo sa Philippine National Police (PNP) Headquarters gidirektahan ang tanan kwerpo sa kapulisan nga walay kamatouran sa maong report.

Daw walay bag-ong direktiba ang buhatan ni Dela Rosa kalabot niini.

Gani ang PNP Spokesperson sa kaulohan nga si Police Chief Superintendent Dionardo Carlos niingon nga walay memorandum kalabot sa polisiya ug ingon man guidelines nga adunay kalambigitan sa imbestigasyon ug relasyon sa media.

Wala usab gibawalan ang mga sakop sa media nga mokuha og access sa mga impormasyon gikan sa police blotter.

Giklaro sab sa PNP nga buot nilang dayag ang tanan kalihokan sa kapulisan ug katungod sa katawhan nga masayod hilabina kung interes kini sa katawhan.

Hinuon gipasabot lamang nga kung adunay mga kamulo nga follow-up operation ug investigation sa usa ka insidente ug dili makuha deretso sa media ang impormasyon gihangyo ang pagsabot labina basin unya makakompromiso sa resulta sa imbestigasyon ug operasyon.

Gihatagan usab og dakong importansya sa kapulisan ang freedom of information hilabina kinahanglan nga dayag sa tanan nga kalihokan.

"This is a safeguard to guarantee that official information are released only to responsible persons for a reasonable and lawful purpose," dugang sa sulat pamahayag.