DAKPAN ang usa ka negosyante human hiniusang gisilbi sa Provincial Public Safety Company uban sa kapulisan ang search warrant niadtong Miyerkules sa buntag, Septembre 20, sa Barangay Manan-ao, Lanao del Norte.
Naila ang dinakpan nga si Constancio Sumondong Ditan, giingong usa ka negosyante sa dapit ug dugay na nga gisundan sa kapolisan.
Positibong nadawat sa kapulisan ang report nga daw naghupot ang suspek ug nagkadaiyang armas hinungdan ilang gi-request sa korte ang search warrant batok niini.
Nakuha sulod sa ilang balay ang usa ka M16 Rifle Elisco, usa ka M16 magazine nga adunay 20 ka buhing bala, duha ka M16 Rifle Replica, 10 ka M16 magazine, 1 ka KG9 magazine, usa ka Cal.22 Magnum live ammo, 4 ka Cal.22 Magnum empty shells, 4 ka 9mm empty shells, 3 ka Cal.45 empty shells, 1 Handcuff, 1 Bulletproof Vest, 1 NBI Badge.
Ang operasyon sa kapulisan nahitabo atubangan sa presensya mismo nila Barangay Captain Laurincia Olivar uban sa usa ka sakop sa prensa.