USA ang Cagayan de Oro City Police Office (Cocpo) sa mga dakbayan nga wala kaayo natalang namatay nga mga nalambigit sa ginadiling druga atol sa mga operation nga gihimo.
Apan niadtong Miyerkules sa hapon atol sa drug operation sa Police Station 4 (PS4) sa Carmen lakip ang Special Operation Unit, PNP-DEG, CIU ug uban pa nga special unit, duha ang napatay sa drug operasyon tungod kay giingong unang gilabayan sa mga drug suspek ang mga pulis og granada dihang ilang namatikdan ang ilang presensya.
Ang mga napatay naila nga sila si Carmelito Saldivas alyas “Kulot” giingong sakop sa BM-29 taga Lanao del Norte ug Ernesto Bradero, 29, ulitawo, taga Sihayon, Sta. Cruz, Tagoloan, Misamis Oriental kinsa gikareport nga mga carnapper ug kanhi priso gikan sa Davao Penal Colony (Dapecol).
Si Police Chief Inspector Mardy Hortillosa, tigpamaba sa Cocpo, namahayag nga ang tibuok pwersa sa Cocpo nasubo ug nasakitan sa pagkamatay sa duha ka mga drug suspek tungod kay ang ilang pwersa wala natala nga mga namatay atol sa mga lehitimo nga mga drug operation.
Apan wala silay lain mahimo kung sila na mismo kapulisan ang madisgrasya hilabina nga gilabay ang mga mirespondeng pulis og granada nga maoy hinungdan nahitabo ang pagpamusil.
Dugang ni Hortillosa nga kung anaa na sa delikado ang kinabuhi sa kapolisan kinahanglan na nila kining aksyunan pinaagi sa pagbalos og pamusil taliwala man wala mibuto ang granada niadtong tungora labina antisipasyon na sa mga polis nga nga posibleng aduna pay mga armas ang mga suspek nga ikasukol batok sa ilang pwersa.
Sa ilang paglabay og granada, nagpasabot nga misukol ang mga suspek ug wala girespeto ang operasyon sa kapolisan.
Gikasubo man sa kapolisan sa Cocpo ang nahitabo apan daw lehitimo ilang operasyon ug dayag nga ila lamang gibaslan ang mga suspek nga maoy unang misukol kanila.