SAMAD pinusilan sa iyang likod nga bahin ang naangkon sa usa ka lalaki human gipusil sa wala mailang suspetsado Dominggo sa kadlawon, Oktobre 2, sa Barangay Cugman ning dakbayan sa Cagayan de Oro.
Giila ang biktima nga mao si Argelo Uran, 45, minyo, residente sa susamang dapit kinsa paingon unta sa iyang trabaho niadtong tungora.
Ang asawa sa biktima nga mao si Marydet niasoy sa mga tigbalita nga kwestyonable karon alang kaniya kinsa ang kaaway sa iyang bana tungod kay 18 ka tuig na silang residente sa dapit ug wala kini sukad gikaengkwentro.
Giklaro usab niini nga wala sab kini nalambigit sa ginadili nga kalihokan sama sa ginadili nga druga.
Sa imbestigasyon sa Police Station 10 sa Cugman nasuta nga sakay ang biktima sa iyang motorsiklo paingon sa trabaho dihang giabayan sa laing motorsiklo ug deretsong gipusil.
Dihang nabati na sa biktima ang hapdos sa iyang likod ug paghilam adunay dugo gipaspasan sa biktima ang pagpadagan sa motorsiklo maayo na lamang wala na maapas sa mga suspek.
Ang biktima anaa karon nagpaalim sa iyang samad nga naangkon sa Northern Mindanao Medical Center.
Sa pagkakaron giimbestigahan pa ang motibo sa pagpamusil ug usa sa gitouhan nga carnap ang motibo.