Hubog gipusil, patay | SunStar

Hubog gipusil, patay

Time to read
1 minute
Read so far

Hubog gipusil, patay

Tuesday, October 03, 2017

PATAY na nga nadiskubre sa iyang kabanay ang 28-anyos nga lalaki nga gituohang gipusil Martes sa buntag, Oktubre 3, sa Barangay Sta. Ana, lungsod sa Tagoloan, Misamis Oriental.

Giila ang biktima nga si Ricky Casiño Ocero, ulitawo, residente sa dapit ug usa ka mag-uuma sa sagingan.

Ang inahan sa biktima niasoy nga hubog ang iyang anak niadtong tungora kuyog iyang bana ug pag-uli niini sa ilang puloy-anan, iyang namatikdan nga namahog pa kini sa ilang binuhing iro lakip ang ilang mga manok.

Gani nakatulog pa kini tupad sa mga manok ug wala na niya gipukaw kay dili kini niya gahilabtan panahon mahubog tungod kay magsinggita kong matandog.

Apan namatikdan sa inahan nga nakamata kini alas 9 sa gabii niadtong Lunes ug nibalhin kini sa iyang lawak.

Nadunggan pa kini niyang misyagit og “kinsay isog diha” apan wala lang kaayo niini gitagad tungod sab kay gisabaan og maayo sa kusog nga awhag sa iro.

Pagkabuntag maoy ilang nadiskubre nga nauklab na ang dingding sa lawak niini ug nakitang adunay samad pinusilan sa ulo si Ricky nga nakahigda pa sa katre niini.

Wala na usab kini kinabuhi dihang ilang gikuptan. Duha sab ka basyo sa bala ang namatikdan sa dapit sa gitouhang kalibre 45.

Ang imbestigador sa Tagoloan Police Station nga si Senior Police Officer 4 Richie Raez nibutyag nga ila pa kining giimbestigahan kung unsay kalambigitan sa biktima.

Nasuta nga napriso kini kaniadto tungod kay nalambigit sa kasong pagpangawat apan giingong midaog kini sa kaso tungod kay daw napasanginlan lamang kini. Aduna sab kini kasong attempted homicide apan naareglo.

Gani wala pa silay identipikasyon sa suspek tungod kay layo sa silingan ang balay sa biktima ug walay nakamatikod atol sa insidente.

Ang pagpamusil wala madungog nga gituohang gigamitan og silencer ang buka sa pistola.

Daghan sab sila gitutokan ug usa niini kung aduna ba kini gikaaway tungod kay daw palainom kini kaayo ug magsige og singgit og away.

Lakip sa giimbestigahan kung aduna ba kini kalambigitan sa ginadili nga druga.

Gipatik sa mantalaang Superbalita Cagayan de Oro Oktubre 04, 2017.

View Comments