Kanhi OFW patay sa bangga sa MisOr | SunStar

Kanhi OFW patay sa bangga sa MisOr

Time to read
less than
1 minute
Read so far

Kanhi OFW patay sa bangga sa MisOr

Wednesday, October 04, 2017

WALA na naantos sa usa ka lalaki ang grabeng bun-og nga naangkon sa lawas human nabangga ang gisakyan nga motorsiklo sa usa ka graider sa Sta. Ana lungsod sa Tagoloan, Misamis Oriental.

Giila ang biktima nga si Vicente Halinion, hingkod ang edad, minyo, residente sa dapit ug giingong nagtrabaho ug bag-o lang kauli isip usa ka Overseas Filipino Worker.

Sa inisyal nga imbestigasyon sa Tagoloan Police Station, nasuta nga kining biktima nagmaneho sa iyang motorsiklo apan sa kusog sa dagan niini mibangga kini sa naka-parking nga graider.

Labihan ka grabe ang pagkabangga gumikan kay namatikdan nga nasibog pa ang graider sa iyang giparkingan.

Dili sab mahitsura ang motorsiklo nga gimaneho sa biktima lakip ang driver nga labihan ang bun-og ug pangos sa lawas ang naangkon.

Gisuwayan pa kini og dala sa Northern Mindanao Medical Center (NMMC), dakbayan sa Cagayan de Oro apan pila ka oras ang nilabay nakabsan sa iyang kinabuhi ang biktima.

Gisuta pa karon sa kapulisan kung aduna bay kasupakan ang driver sa graider truck nga ni-parking human gika-report nga wala kini early warning device.

Migawas sab ang report nga daw lango sa ilimnong makahubog ang driver apan padayon pa kining gisuta sa kapolisan.

Gipatik sa mantalaang Superbalita Cagayan de Oro Oktubre 05, 2017.

View Comments