'Playboy' gitipi | SunStar

'Playboy' gitipi

Time to read
less than
1 minute
Read so far

'Playboy' gitipi

Friday, October 06, 2017

NAKABSAN sa kinabuhi ang usa lalaki samtang samaran iyang anak ug kaipon human gipamusil niadtong Huwebes mga alas 10 sa gabii sa Barangay Sta. Cruz, lungsod sa Tagoloan, Misamis Oriental.

Si Senior Police Officer 4 Tawide Galeon, imbestigador sa Tagoloan Police Station, miila sa namatay nga si Walter Quimquinio, residente sa dapit ug usa ka driver sa Misamis Oriental Provincial Police Office sulod sa upat na ka bulan.

Samaran sab iyang kapuyo nga si Marissa kinsa tulo ka bulan nga mabdos ug anak nga si Junward.

Sa inisyal nga imbestigasyon sa kapulisan, nasuta nga kining biktima anaa na sulod sa ilang balay niadtong tungora apan usa ka wala mailang suspetsado ang misulod ug diretsong gipusil ang biktima. Naigo kini makaduha ka higayon sa iyang ulo hinungdan sa iyang hinanaling kamatayon.

Nalakip og kaigo ang kaipon nga si Marissa ug anak nga si Junward kinsa pulos gipangdala karon sa Northern Mindanao Medical Center (NMMC), dakbayan sa Cagayan de Oro.

Matud ni Galeon nga anaa ang biktima sa drug watchlist apan giingong nagbag-o na kini. Dako ilang pagduda nga batal ang usa sa motibo sa pagpamusil.

Apan ang kaipon sa biktima niangkon nga iyang bana adunay mga naburosan nga tulo ka mga babaye.

Hinuon ang pamahayag sa kaipon ang lakip sa gikonsiderang motibo sa pagpamusil patay.

Gipatik sa mantalaang Superbalita Cagayan de Oro Oktubre 07, 2017.

View Comments