Kapulisan gidid-an na nga mangtokhang | SunStar

Kapulisan gidid-an na nga mangtokhang

Time to read
less than
1 minute
Read so far

Kapulisan gidid-an na nga mangtokhang

Thursday, October 12, 2017

ANG Police Regional Office (PRO)-Northern Mindanao nihulat na lamang og memorandum aron mapatuman nga gidid-an na sila sa mga drug bust.

Matud sa tigpamaba sa PRO-Northern Mindanao nga si Police Superintendent Lemuel Gonda nga ila pa nga gihulat ang kamandoan gikan sa Camp Crame aron hingpit kini nilang masunod sa rehiyon.

Hinuon magpabilin silang naka-monitor sa mga nalambigit sa ginadili nga druga sa rehiyon ug andam silang suportahan ang Philippine Drug Enforcement Agency (PDEA)-Northern Mindanao nga mao na lamang gitahasan ni Presidente Rodrigo Duterte nga mohimo sa mga drug operation.

Dugang ni Gonda nga ila girespeto ang kamandoan sa presidente.

Sa memorandum nga gipagawas sa presidente niadtong Miyerkules, Oktubre 11, gibutyag niini nga ang mga law enforcement agencies sama sa Philippine National Police, National Bureau of Investigation (NBI), Bureau of Customs (BOC) ug ang nagkalain laing task forces kinahanglan nga magtugyan sa mga operasyon sa PDEA isip nag inusara na lamang nga ahensya nga mohimo sa anti-illegal drugs operations.

Dugang sa kamandoan nga ang PNP momintinar lamang og police visibility panahon sa operasyon.

Kung aduna sab mga impormasyon ang kapulisan kalabot sa mga nalambigit sa ginadili nga druga iduso kini sa PDEA aron maoy mag imbestiga.

Gipatik sa mantalaang Superbalita Cagayan de Oro Oktubre 13, 2017.

View Comments