Patay'ng lawas napalgan sa payag-payag | SunStar

Patay'ng lawas napalgan sa payag-payag

Time to read
less than
1 minute
Read so far

Patay'ng lawas napalgan sa payag-payag

Thursday, October 12, 2017

ANAA na sa pagkadugta ang patay nga lawas sa usa ka lalaki nga napalgan sa payag-payag niadtong Miyerkules sa gabii, Oktubre 11, sa ilang fishpond sa Zone-8, Barangay Bulua, dakbayan sa Cagayan de Oro.

Ang biktima nailang si Francisco Llamis Jr., 49, minyo, ug taga Zone-8.

Sa nahipos nga impormasiyon gikan sa kapulisan sa Police Station 7 (PS7) sa Bulua, nasayran nga nagpatala ang igsoon sa biktima nga si Almond Llamis, 42, minyo, taga Zone-6, Bulua human nakita ang patay nga lawas.

Gikabutyag nga mga anaa na sa tulo ka mga adlaw sukad nga wala makauli sa ilang balay ang biktima apan ulahi na kini silang nakadalikyat sa ilang fish pond ug nakurat sa dihang napalgan kini nga wala na’y kinabuhi.

Sa inisyal nga pakigsusi sa mga otoridad sa patay nga lawas sa biktima, gikabutyag nga wala’y nakitang mga samad agi og ilhanan nga gipanamastamasan ang biktima o gituyo kini sa pagpatay. Gituohang posibleng gi-urom ang nahisgutang biktima apan dili pa kini makompirma.

Sa pagsulat niini nga balita, ang patay nga lawas ang gi-atiman na sa nahabiling pamilya samtang ang kapulisan padayon pa sa pag-imbestiga sa tinuod nga hinungdan sa kamatayon.

Gipatik sa mantalaang Superbalita Cagayan de Oro Oktubre 13, 2017.

View Comments