NAGPATALA sa kapulisan ang usa ka residente human kini gisumbag gumikan kay gipasanginlan nga mao’y hinungdan sa sunog sa Barangay 22, dakbayan sa Cagayan de Oro.
Nidangop sa buhatan sa kapulisan si Alicia Lacurin, 44, ug residente sa nahisgutang dapit human pasanginli si Apad Merinillo nga mao’y hinungdan sa dakong sunog.
Sa impormasiyon gikan sa Police Station 3 (PS3) sa Agora, gikabutyag nga nagpakitabang kini human gisumbag ang iyang dagway ug gihulga.
Giingong gitumbok nga sa balay niini unang nagsumikad ang kalayo hinungdan nga nadamay ang mga kasigbit nga balay lakip na ang balay niini.
Giingong gihulga kini og giingnan nga “Bantay ka lang patyon tika, balikan tika” hinungdan nga gikabalaka kini sa biktima.
Nakaangkon ang biktima og bun-og sa iyang dagway human kini gisumbag matud pa ni Merinillo.
Sa pagsulat niini nga balita, ang insidente ang nakatala na sa tinugyanan sa kapulisan alang sa tukmang disposasiyon.