Mga nasunogan dismayado kay gipangkawatan | SunStar

Mga nasunogan dismayado kay gipangkawatan

Time to read
1 minute
Read so far

Mga nasunogan dismayado kay gipangkawatan

Friday, October 13, 2017

KAGUOL ang gibati sa pipila ka mga biktima sa sunog sa Barangay 22 ug 26, dakbayan sa Cagayan de Oro gumikan kay gikawatan pa sila atol mismo sa hitabo.

Sa talaan sa City Social Welfare and Development (CSWD), moabot sa 30 ka balay ang nasunog sa Barangay 26 samtang 6 sa Barangay 22.

Sa interbyu sa SunStar SuperBalita sa usa sa nasunogan nga si Virgilio Labial, gibutyag niini nga adunay nagpurong-purong nga mga lalaki ug nisulod sa balay.

Nagpakita og simpatiya ug moingon motabang og hakot sa gamit apan diay dalahon lamang nila. Gibutyag niini, sagad sa nawala ang mga mahalon nga speaker ug uban pa nga nabitbit og lakip.

Hinuon wala na lamang kini gisapayan ni Virgilio tungod kay mas importante kaniya ang kinabuhi kaysa kabtangan.

Dili lamang si Virgilio ang mireklamo apan aduna pay pipila ka mga nasunogan nga nagbagotbot ug nakahilak tungod kay lakip sa nakawatan.

Tabang nagsing-abot

Human gideklarar sa Bureau of Fire Protection nga totally fire out na ang sunog mga alas 6:30, unang miabot ang tabang gikan sa kagamhanan sa Misamis Oriental diin diretsong gi turn-over ngadto kang Kapitan Alexander Dela Cerna ang mga goods sama sa 20 ka sako nga bugas, 600 ka lata sa sardinas, 200 ka lata sa corned beef, 200 ka lata sa beef loaf; 20 ka container sa tubig ug tulo ka box sa noodles nga maoy naluto sa pipila ka mga nasunogan alang sa ilang panihapon.

Gibutyag ni Nicole Managbanag, kinsa Misamis Oriental Provincial information officer, ngadto sa SuperBalita walay pili si Governor Bambi Emano sa paghatag sa hinabang taliwala anaa kini denhi sa siyudad tungod kay daghan sa mga nasunogan ang nanginahanglan.

Daan na usab niini gibutyag nga dili niini isapayan kung siya batikuson ang importante napaabot ang tabang sa mga nasunogan.

Mga alas 7 sa gabii niabot ang City Social Welfare Development uban mismo ni City Administrator Dionne Gersana diin ilang gimuntar ang daghang tent alang sa mga nasunogan.

Gisugdan sab dayon nila og pang-apod ang mga tabang sa mga nasunogan sama sa pagpanghatag ug kaldero, banig ug uban pa nga nag-unang panginahanglan sa mga residente nga apektado.

Matud ni Gersana nga sunod adlawng Huwebes gikatakdang ipagawas sa dakbayan ang ilang hinabang nga cash assistance.

Sa iyang bahin ni Kapitan Alexander Dela Cerna, mapasalamaton kini nga mitubag deretso sa panginahanglan ang siyudad ug probinsya, apan sa pagkakaron padayon sila sa pagdawat ug tabang hilabina daghan sa mga nasunogan tapot lawas lamang.

Gipatik sa mantalaang Superbalita Cagayan de Oro Oktubre 14, 2017.

View Comments