DUHA ka adlaw ang gikatakdang transport strike nga sugdan karong adlawa hangtod ugmang adlawa sa tibuok nasod.
Tungod niini gisuspenso sa palasyo sa Malacañang ang klase ug trabaho sa gobyerno karong adlawa apan wala nay labot sa adlawng Martes.
Matud sa buhatan sa Executive Secretary ubos ni Salvador Medialdea nga ang suspension sa trabaho ug klase sa mga pribadong sektor magdepende gihapon sa desisyon sa employers.
"As to suspension of govt work, we shall issue the usual memorandum circular," dugang pahibalo niini.
Ang Pinagkaisahang Samahan ng mga Tsuper at Operator Nationwide (Piston) sa tibouk nasod ang magpahigayon og duha ka adlaw nga strike nationwide aron pugngan pagsupak sa government's public utility vehicle (PUV) modernization program nga ilang gikareport nga ang pagphasep-out sa mga dyip ug rekisitos mao ang pag purchase sa bag-o ug mahal nga model.
Lakip sa gikatakdang mosuporta sa nationwide transport strike mao ang nagkalain-laing sektor sama sa Kadamay, Migrante, League of Filipino Students ug Kilusang Mayo Uno.
Si Ringo Lago kinsa Secreatry General sa STAREX-Piston Northern Mindanao nibutyag sa SunStar SuperBalita nga kini nga transport strike makapatay-og ug dako gyod kini nga kalihokan karong adlawa labina nga gisuspenso na ang klase ug trabaho sa tibouk nasod.
"Natarog na gani ang gobyerno sa ilang pagsuspenso sa klase ug trabaho nagpasabot nga kung dili ta molusad dili dunggon atong hangyo," matud ni Lago.
Dugang niini nga labihan ka apektado ang mga yanong driver ug mga operator kung ila gyod pugson nga mapatuman kining PUV modernization program tungod kay motaas ang renta sa operator taas na usab ang boundary sa mga pampasaherong sakyanan mao nga dako silang supak niini.
"Ang mahitabo man gud dayon samot nga magkalisod lisod atong mga driver ug tanan tibuok pamilya apektado na dayon kay atong suholan gamay lang gihapon kaayo," dugang ni Lago.
Lakip sa mga protest center nga gilaumang daghang rallyista makita karon diha sa Bulua, Carmen, Puerto, Lapasan, J.R. Borja, ug ang sentro diri sa Licoan Junction ning siyudad.
Gibutyag usab ni Lago nga malinawon ilang pagpahigayon sa protesta ug gi-discourage ang tanan nga mga kauban nga magprotesta nga likayan ang pagpanuyak ug uban pa karong adlawa.