Kamatayon ni Hapilon, Maute gikalipay | SunStar

Kamatayon ni Hapilon, Maute gikalipay

Time to read
1 minute
Read so far

Kamatayon ni Hapilon, Maute gikalipay

Tuesday, October 17, 2017

"Dili masabot akong kalipay nga gibati."

Kini ang pamahayag sa usa ka bakwit sa lima ka bulan nga lumad nga taga Marawi City.

Si Asima Pangandaman, usa ka artist ug usa sab sa tighatod og mga hinabang sa mga bakwit nga mga muslim ning dakbayan sa Cagayan de Oro, nibutyag sa interbyu sa SunStar SuperBalita nga lipay kaayo siya ug iyang pamilya sa report nga namatay na ang Maute leader nga si Omar Maute ug Isnilon Hapilon kinsa adunay kalambigitan sa Islamic State of Iraq and Syria.

Matud ni Pangandaman nga tungod niini, hayag na kaayo nga posibleng maundang na ang giyera sa Marawi ug niini makabalik na sila sa ilang puloy-anan nga nawala kanila sulod sa lima ka bulan.

"Among balay man gud didto war zone siya sa pirmero mao nga wala nami nag-expect unsa iyang hitsura karon." matud niini.

Dugang ni Pangandaman nga naghinam-hinam na iyang mga ginikanan nga makabalik sa Marawi aron makita ang kahimtang sa ilang balay.

Wala paman plano iyang mga ginikanan nga mobalik sa pagtukod ug magpuyo didto apan halos tanang bakwit buot na makabalik didto.

Hinuon gibutyag niini nga daghan pang uban Muslim nga nagkalisod-lisod karon sa panginabuhian ug pinansyal ning panahona. Pipila kanila nanglangyaw sa kaulohan aron ipadayon ang ilang negosyo.

Aduna sab uban nga posibleng dili na mobalik sa Marawi kay daw naka-adjust na diri ug naplastrar na usab ang pagtungha sa mga tunghaan dinhi sa dakbayan.

Kahinumduman, namahayag niadtong Lunes si Defense Secretary Delfin Lorenzana nga sa pagkamatay sa duha ka mga terorista senyales kining matapos na ang kagubot sa Marawi apan ang kasundalohan padayon sa pag-aresto sa lain pang miyembro sa Maute group.

Sa pagsugod sa kagubot lima na ka bulan ang nilabay, nasayran nga moabot na sa 753 ka mga terorista ang napatay. Mokabat sab sa 47 ka mga sibilyan ug 155 ka mga sundalo ang namatay ug libo libo ka mga residente ang pwersadong gipabakwit.

Gipatik sa mantalaang Superbalita Cagayan de Oro Oktubre 18, 2017.

View Comments