Babaye ug lalaki gikulata sa kanhi uyab nga tomboy

GITABANGAN sa pagkulata ang giingong bag-ong uyab sa usa ka babaye sa kanhi uyab niini nga tomboy kauban ang mga barkada niadtong milabay nga adlaw diha sa Velez Street sa dakbayan sa Cagayan de Oro.

Nidangop sa kapolisan ang biktima nga si Krystelle (dli tinuod nga ngalan), 24, dalaga nga taga Zone 6, Barangay Kauswagan ning siyudad samtang gitabangan sa pagkulata ang iyang giingong higala lamang nga mao si Carl (bansagon gitago), 25, ulitawo nga taga Barangay 27 ning dakbayan.

Sa impormasiyon nga nahipos gikan sa buhatan sa kapolisan sa Police Station 2 (PS2) sa Cogon gikabutyag nga samtang anaa sa maong dapit ang mga biktima kalit lang matud pa nga niduol ang giingong ex-girlfriend ni Krsytelle kauban ang lima ka mga wala mailang mga babaye ug laing pito ka mga lalaki.

Giingong kalit nga gitabangan sa pagkulata ang biktima nga si Carl, gihapak og iron bar ug gilabay pa og bato hinungdan usab sa pagka-igo sa mata ug baba ni Krystelle. Gidugang pa usab niini nga gibaharan pa usab kini pinaagi sa mensahe sa cellular phone nga dili pa matud to mao ug dili pa to ang ulahing higayon nga pasakitan kini.

Nakaangkon ang duruha ug nagkadaiyang bun-og sa kalawasan ilabi na si Carl human sa maong gihimo sa suspetsado ug mga kauban niini.

Gikabutyag nga posibleng wala pa makadawat ang tomboy nga nailang si Rose nga taga Agusan del Norte sa nadangatan sa ilang relasiyon ilabi na sa ilang panagbulag. Giingon usab sa biktima nga babaye nga higala lamang niini si Carl.

Sa pagsulat niini nga balita ang maong insidente ang nakatala na sa buhatan sa kapolisan alang sa tukmang disposasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph