Barangay kapitan gipusil sa Iligan | SunStar

Barangay kapitan gipusil sa Iligan

Time to read
1 minute
Read so far

Barangay kapitan gipusil sa Iligan

Tuesday, November 14, 2017

USA ka barangay kapitan gipusil makapila ka higayon mga alas 8 sa gabii niadtong adlaw'ng Lunes, Nobyembre 13, sa Barangay Pala-o, dakbayan sa Iligan.

Ang biktima giilang si Alzuhry Lucman Dipatuan, 35, minyo, barangay kapitan sa Kalawit, lungsod sa Bacolod, Lanao del Sur.

Ang biktima nakaangkon og tulo ka mga samad pinusilan diin duha sa iyang dughan ug sa walang bahin sa iyang siko.

Ang biktima, kinsa unang gidala sa Adventist Medical Center, ang giduso karon sa pribadong tambalanan sa dakbayan sa Cagayan de Oro kinsa padayon pa nga giobserbahan ang kondisyon.

Sa inisyal nga imbestigasyon sa Iligan City Police Office, nasuta nga ang biktima sakay niadtong tungora sa driver seat sa Toyota Fortuner nga kuyog iyang pamilya.

Gi-parking kini atubangan sa Kelsy Food House dihang wala mailang suspetsado ang mipusil sa biktima pipila ka higayon gamit ang wala pa masutang kalibre.

Human sa insidente, daling misibat ang suspetsado sakay sa wala pa mahibaloan nga sakyanan samtang ang biktima nakamaneho pa sa iyang sakyanan apan sa kusog nga dagan, aksidente niining nabanggaan ang usa ka Toyota Vios color gray nga gimaneho ni Nissah De Campong ug miangin pa sa laing duha ka mga sakyanan nga Isuzu Alterra nga gi-parking sa usa ka kan-anan ug laing Toyota Innova ng gimaneho ni Alioden Macadato.

Narekober sa mga polis gaeas sa Kelsy’s Food House ang unom ka basyo sa bala sa kalibre 45 ug nakita ang lima ka mga buslot pinusilan sa sakyanan sa biktima.

Ang kapolisan sa Iligan City Police Station 5 misuta pa sa motibo sa pagpamusil ning panahona apan migawas ang report nga rido kon family feud ang hinungdan sa insidente.

Gipatik sa mantalaang Superbalita Cagayan de Oro Nobyembre 15, 2017.

View Comments