NAGHILAK nga midangop sa kapolisan ang usa ka dalaga human nga nabiktima sa modus sulod sa dyip mga alas 6:50 sa buntag Biyernes, Nobyembre 17, sa Hayes Street, dakbayan sa Cagayan de Oro.
Nidangop ang biktima nga si Jubelyn Dumatol, 32, dalaga ug residente sa Barangay Carmen.
Gibutyag sa biktima nga si Dumatol nga samtang nagsakay kini sa pasaheroan nga dyip ilabi na ang Zions nga multicab tapad niini ang usa ka lalaki kinsa nagdala og dakong bag ug mao’y gidudahan nga suspetsado.
Giingong nikanaog na ang suspek sa multicab sa dihang namatikdan nga wala na ang iyang mahalon nga cellular phone ug kwarta hinungdan nga iya pa nga nagukod ang suspek apan dali kining mipalayo paingon sa terminal sa Calaanan, Canitoan hangtod nga kini nahanaw.
Gidugang pa ni Dumatol nga wala kini makamatikod nga posibleng gikubi na ang iyang bag samtang nagsakay sa multicab ug wala makabantay nga gi-ablihan na kini og nakuot na ang mahalon nga cellular phone nga nagkantidad og P7 mil lakip na ang pitaka nga adunay sulod nga P3,400.
Pahimangno sa mga kapolisan nga magbinantayon ilabi na kay modus matud pa kana sa mga suspetsado kinsa magdala og mga dagkong bag aron nga makahimo kini sa pagpangawat pinaagi sa pagtabon sa ilang kamot.
Ang suspetsado nakasul-ob og itom nga kalo, taason, dakuon ang panglawas ug gibana-banang anaa sa mga 40 anyos ang pangidaron kinsa nagdala-dala og dakong bag.
Nasayran nga ubay-ubay na ka mga biktima sa susama niini nga modus diin lipaton lamang ang mahimo niini nga biktima pinaagi sa pagtabon sa dakong bag.
Sa pagsulat niini nga balita, nakatala na ang insidente diha sa Police Station 2 sa Cogon alang sa follow-up operation.