MIDANGOP sa kapolisan ang pipila ka mga magtutudlo human nga naglasong ang usa ka inahan kinsa gipatawag sa tunghaan gumikan sa anak niini niadtong Martes sa may Barangay Lapasan, dakbayan sa Cagayan de Oro.
Nasayran nga nagpatala sa kapolisan sa Police Station 3 (PS3) sa Agora ang school principal, assistant administrator ug school secretary sa usa ka pribadong tunghaan kalabot na sa inahan sa menor de edad nga nailang si Mrs. Khandee (bansagon gitago) human sila gipakaulawan ug gibaharan nga magsumbong kini sa Department of Education (DepEd).
Sa nahipos nga impormasiyon sa kapolisan sa Agora, gikabutyag nga nidangop ang magtutudlo ug gireklamo si Khandee.
Gikabutyag nga niadtong Nobyembre 16, gisulayan sa pagpatawag sa administrator ang ginikanan sa usa ka Grade 9 student pinaagi sa sulat kalabot na sa pagpakaylap niini sa hubo nga hulagway sa iyang kanhi hinigugma sa social media apan wala kini nakatunga.
Giingong dako na lamang ang ilang kakurat sa dihang nahidangat kini niadtong Martes sa tunghaan nga suko kaayo ug nag-iskandalo.
Gidugang pa nga nagsinggit-singit pa kini pinaagi sa pag-ingon nga “In-ani diay mo diri, hypocrite, kung unsay kasuko ninyo sa ako maam, ayaw apil-apila ang bata, wala bya ko’y utang diri, isumbong ta mo sa DepEd!” hinungdan nga gibati og kaulawon ang mga magtutudlo tungod kay daghan ang mga nakasaksi ug nakadungog sa pagsinggita niini.
Gikakurat kini sa mga magtutudlo tungod kay buot lamang nila kini nga ipatawag human nga gipangpasa sa anak niini ang hubo nga hulagway sa iyang kanhi uyab.
Sa pagsulat niini nga balita, ang insidente ang nakatala na sa buhatan sa kapolisan.