Bana gipaak sa asawa | SunStar

Bana gipaak sa asawa

Time to read
1 minute
Read so far

Bana gipaak sa asawa

Wednesday, December 06, 2017

NIDANGOP sa kapolisan ang usa ka bana human nga kalit nga gipaak sa asawa samtang anaa sa Gaston park, Gaerlan Streets, dakbayan sa Cagayan de Oro.

Nagpatala ang bana nga nailang si Rodrigo (bansagon gitago), 42, minyo ug residente sa Green Heights, Balulang samtang ang asawa naila nga si Charlene (bansagon gitago), 32 anyos.

Sa impormasiyon nga nahipos gikan sa kapolisan sa Police Station 1 (PS1) sa Divisoria, gikabutyag nga samtang nag-abot ang biktima ug ang asawa niini sa maong dapit nagkalalis ang duha ug gipaak ni Charlene ang iyang bana.

Gikabutyag nga aduna na matud pa’y lain kining si Charlene ug naglalis ang duha tungod kay gusto ni Charlene nga ubanon ang mga anak apan buot sa mga anak niini nga sa ilang amahan mokuyog.

Gikasuko kini ni Charlene ug kalit nga gipaak si Rodrigo bisan pa man nga daghan ang nakakita atol sa panghitabo.

Nakaangkon kini og samad sa iyang tuo nga bahin sa bukton human kini gipaak sa kaugalingong asawa.

Samtang laing lalaki ang nidangop sa mga otoridad human nga gikulata sa iyang kanhi kaipon sa J.R. Borja Street, Barangay 39.

Gibati og kaulawon ang biktima nga si Jacky (bansagon gitago), 18, ulitawo ug residente sa Zone-10, Zayas, Carmen human nga giguyod ug gikulata sa kanhi kaipon nga si Monaliza (bansagon gitago), 19, nga taga Piaping Puti, Macabalan diha mismo sa daghang mga tawo.

Gibutyag ni Jacky nga samtang anaa sa patigayon kalit lang matud pa kining gibira ang iyang buhok ug gisipa ni Monaliza.

Gidugang pa nga dili pa igo gihapak pa ang iyang likod hinungdan sa pagkaaon niini og bun-og sa kalawasan hinungdan nga giabti ug kaulawon tungod kay daghang mga tawo ang nakakita atol sa panghitabo.

Sa pagsulat niini nga balita, ang insidente ang giduso na sa Barangay Lupon alang sa tukmang disposasiyon.

Gipatik sa mantalaang Superbalita Cagayan de Oro Disyembre 07, 2017.

View Comments