Kapolisan balik giyera kontra druga | SunStar

Kapolisan balik giyera kontra druga

Time to read
less than
1 minute
Read so far

Kapolisan balik giyera kontra druga

Wednesday, December 06, 2017

BALIK giyera kontra druga ang kapolisan sugod Martes, Disyembre 5, human duha ka bulan nga gidid-an ni Presidente Rodrigo Duterte nga molambigit sa mga operasyon.

Gibutyag ni Police Superintendent Lemuel Gonda, kinsa tigpamaba sa Police Regional Office (PRO)-Northern Mindanao, nga naghulat pa sila og memorandum kon direktiba aron masugdan ang mga operasyon.

Gikalipay usab kini sa kapolisan gumikan kay nasayod sila nga ang Philippine Drug Enforcement Agency (PDEA) nga maoy adunay dakong papel sa mga operasyon ang kulang og personahe ug andam sila nga moabag kanila labina kini maoy magpabiling lider nga ahensya.

Sa pagkakaron, andam sila sa pagdawat og mga inpormasyon kalabot sa mga nagpayuhot, nagamitan ug ginadili nga druga ug i-report kini sa ilang buhatan labina padayon ilang koordinasyon sa PDEA.

Buot sab ipaabot ni Gonda nga walaon kining pagduda sa pipila labina ang mga isyu nga adunay mga planting ug mga extrajudicial killing tungod kay sa rehiyon wala kini nahitabo.

Hinuon malaumon kini nga unta sa pagbalik sa ilang operasyon aduna gayud kining body camera tungod kay alang man kini sa proteksyon dili lamang sa suspek sa operasyon apan lakip sa kapolisan.

Kahinumduman niadtong Martes, gipirmahan ni Presidente Duterte ang memorandum order nga ibalik ang operasyon sa kapolisan, National Bureau of Investigation lakip ang uban special unit nga mohimo sa pakigbatok sa ginadili nga druga.

Gipirmahan kini sa presidente tungod sa giingong public clamor, diin daghan ang miawhag nga balikon ang kapolisan sa kampanya labot niini.

Gipatik sa mantalaang Superbalita Cagayan de Oro Disyembre 07, 2017.

View Comments