Reward alang sa Rotoras case misaka sa P2 million

POSIBLENG mosaka ngadto sa P2.5 milyon ang reward sa makatudlo sa killer ni University of Science and Technology of Southern Philippines (USTP) President Dr. Ricardo Rotoras.

Unang mitanyag og P1 milyon si Cagayan de Oro City Mayor Oscar Moreno sa makatudlo sa killer ni Rotoras.

Niadtong Martes sa gabii, opisyal nga nagpadala og sulat pamahayag ang grupo sa Masonic District sa Northern Mindanao nga modugang ang Masonic community og laing P1 milyon aron mas mapaspasan ug mapadali ang hustisya sa kamatayon sa ilang kauban.

Si Atty. Oscar Musni, spokesman sa Masonic Community, niingon nga nagkasabot silang tanan sa grupo nga mag-ambag og kantidad tungod kay daw dili sila makatugot nga magpabiling gawasnon ang killer niini hangtod ning panahona.

Dugang ni Musni nga daghan kaayo og natabangan si Rotoras lakip na ang pagduso nga ilibre ang tuition sa mga tinun-an sa gobyerno ug daw dili niini deserve nga patyon sa niloug nga paagi.

Apan adunay dako nga posibilidad nga mosaka ngadto sa P2.5 milyon ang reward money gumikan kay kagahapong adlawa gisugyot ni Cagayan de Oro City Councilor Teodulfo Lao nga ilang dugangan sa konseho ang maong kantidad.

Daw himoun niya og paagi nga maaprobahan kini sa finance committee aron makadugang kini sa reward money.

Kahinumduman gipusil patay si Rotoras ug nahitabo ang insidente mga ala 1 sa kadlawon diin nakaangkon kini og walo ka samad pinusilan sa lawas nga maoy hinungdan nakabsan sa kinabuhi dihang nahidangat sa tambalanan.

Matud sa iyang personal driver nga si Jonathan Khobuntin nga gikan sila nagtambong og party daw pagnaog ni Rotoras sa sakyanan ug samtan iyang giplastar ang sakyanan aron i-parking nakadungog siya og sunod-sunod nga buto.

Lawom nga imbestigasyon

Una na nga gibutyag ni Cagayan de Oro City Police Office (Cocpo) Director Robert Roy Bahian atol sa pakighinabi sa mga sakop sa media lakip ang SunStar SuperBalita nga dili niya bout mosulti sa mga detalye sa ilang imbestigasyon sa kaso ni Rotoras.

Aduna na silay mga angulo nga gitutokan ug gipangi-imbestigahan ning panahona.

Nalipay sab kini sa mga reward money nga gitanyag tungod kay dako ang tsansa nga paingon kini sa kasulbaran sa kaso.

Hinuon gipaabot sab niini nga kung aduna pay nasayod kalabot sa panghitabo ireport kini sa ilang buhatan labina mitutok niini nga kaso ning panahona ang iyang gimugna nga mao ang special investigation Task Group Rotoras.

Gibaha og pahasubo

Gihaya ang patayng’ lawas ni Dr. Rotoras sa Cosmopolitan Funeral Homes diin nagbaha ang daghang pahasubo gikan sa school community ug uban pa nga grupo nga gilangkoban niini.

Si Mayor Oscar Moreno ang nahidangat sa punerarya aron personal nga mopaabot sa iyang pahasubo sa nahibilin nga pamilya.

Si kanhi Mayor Vicente Emano, kanhi bise mayor Caesar Ian Acenas ang nahidangat sab aron mopaabot sa ilang personal nga pahasubo sa pamilya.

Sa iyang bahin sab ni Misamis Oriental Governor Yevgeny Vincente Emano, iyang gibutyag nga subo kaayo siya sa kamatayon ni Rotoras tungod kay iya unta kining landlord sa Initao panahon nga mabalhin ang provincial jail sa dapit.

Tungod usab kay kasamtangan nga presidente si Rotoras sa Philippine Association of State Universities and Colleges mokabat sa 112 ka mga presidente gikan sa nagkalain laing unibersidad ang nipaabot sa ilang pahasubo.

Adlaw'ng Martes gikan sa Cosmopolitan funeral homes gibalhin ang iyang haya sa USTP gymnasium aron sab mahatagan kini og pasidungog sa mga magtutudlo ug mga tinun-an sa tunghaan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph