PERSONAL nga giduaw ni Department of Interior and Local Government Undersecretary Gen. Eduardo Año ang Binuangan Police Station Biyernes sa lungsod sa Binuangan, Misamis Oriental.
Ang pagduaw ni Año nahitabo pipila ka adlaw human gisulong sa gatusan ka mga sakop sa New People’s Army (NPA) ang maong istasyon apan naprotektahan kini sa mga polis sa Binuangan.
Niadtong Huwebes, gibisita una ni Año si Police Officer 3 Ricardo Bernadas nga nagpaalim pa karon sa Capitol University Medical Center, dakbayan sa Cagayan de Oro diin iyang gihatagan og P10 mil nga cash ug pistola.
Biyernes sab milahos kini sa Binuangan Police Station aron pasidunggan ang laing walo ka mga polis nga nakigbatok sa NPA niadtong Domingo sa kadlawon.
Ang gipasidunggan mao ang hepe sa istasyon nga si Police Senior Inspector Dante Hallazgo, Senior Police Officer (SPO) 4 Lorimer Cabil, SPO1 Ramonito Zambas, PO3 Crispin Dalugdug, PO2 Necil Japuz, PO1 Joshua G Satur, PO1 Laila Gumahin.
Gidayeg og maayo ni Año ang kaisog nga gipakita sa kapolisan gumikan kay bisan og walo lamang sila niadtong tungora sa istasyon naprotektahan nila og maayo ilang istasyon ug wala nalupigan ang daghang NPA nga misulong.
Laraw sab karon sa kagamhanan sa gobyerno nga butangan og perimeter fence ang maong istasyon aron dili na masubli ang paglusob sa NPA.