Parricide atubangon sa bana nga nakapatay sa asawa

POSIBLENG mag-atubang sa kaso nga parricide ang usa ka lalaki human nga giingong gipatay ang iyang asawa niadtong Dominggo sa buntag diha sa may Toma Saco -14th Street, Barangay Nazareth, ning siyudad sa Cagayan de Oro.

Nagtingkagol na ang suspek nga nailang si Salvador Bustamante, 44; samtang ang biktima nailang si Marissa Bustamante, 38, pulos residente sa Quezon, Bukidnon.

Sa pakighinabi sa SunStar Superbalita ngadto kang Senior Police Officer 1 (SPO1) Glenn Palugna, imbestigador sa Police Station 9 sa Macasandig, mibutyag nga ipasaka na nila ang kasong parricide batok ni Salvador Bustamante.

Gidugang pa nga kung ugaling dili moabot ang complainant, ipasaka gihapon nila ang kaso ug ang piskalya na ang mopahiluna niini.

“E-file namo ning kaso. Nahuman naman nako ang ubang papel, file-lan namo ni siya’g parricide. Gihulatan lang namo ang complainant ani,” pahayag ni SPO2 Palugna.

“Ang mga silingan didto nakit-an lang nila nga naa na didto’y naghigda nakit-an lang nila nga naa’y nidagan didto sa area nasundan man sa mga silingan mao tong naka-report diri sa police station nisakay naman ni siya sa Buena Oro nga dyip, naapas namo kay isa man sab ko sa arresting officer, gipakanaog namo sa dyip,” pahayag ni Palugna.

Sa bahin ni Bustamante, gibutyag niya nga gisundan niya ug nadunggan pa nga nag-estorya ang iyang asawa ug ang bayaw pina-agi sa telepono nga manlaag matud pa kini. Giingong gi-apas lamang niini ang asawa kay lage buot nga ipapauli para na usab sa ilang mga anak ug gani andam gihapon niini nga dawaton bisan pa man sa nahimo.

“Sakit kaayo sa akong buot naminaw, diha ko sa luyo,” pahayag ni Bustamante.

Giingong iya kining gihangyo nga makigbalik kaniya apan gadumili gyud ang biktima sa pagbalik ug mibutyag pa nga siya na ang bahala sa ilang mga anak ug magpadala na lamang kini og kwarta.

“Sige siya’g lakaw ako sige pud kog sunod sige ko’g hangyo nga mouli ta. Kay kini akong pag-ari, wala gali nako ni mapalit og bugas sa atoa kay ako ning giprepare daan nga makaplete tang duha pauli,” dugang pahayag ni Bustamante.

Gimahayan ni Bustamante ang nahimo apan giingong wala kini intensiyon nga patyon ang asawa gani dili matud pa iyaha ang maong kutsilyo.

“Sige pud ko’g sunod-sunod unya diay pag-abot atong nabiktimahan naa man diay siya’y kutsilyo, ma'am. Ang iya sigurong tuyo ato, patyon ko niya siguro didto, nikalit man lang siya’g atubang sa akoa largo’g hansak sa kutsilyo. Nakalayat ko, ako dayong gidakop iyang pulso nailog na nako, ang isa ka kamot niya iya naman pud nga giana sa suwag nahayang man siya ato, mao to ingon sila nga akong giludhan, wala kay gailoganay mi sa kutsilyo mao to sa pagbira naahansak didto sa iyang li-og dili gyud to ingon nga intensiyon nako nga gigulgol” saysay pa niini.

Nasayran nga mibiya matud pa ang biktima nga si Marissa ug nakig-ipon sa bayaw kinsa bana ra usab sa igsoon sa suspek nga si Salvador.

Sa pagsulat niini nga balita, ang maong suspek kasamtangang anaa sa kustodiya sa kapulisan sa Macasandig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph