GIKLARO sa kagamhanan sa probinsya sa Misamis Oriental nga walay nabakanuhan sa kontrobersyal karon nga dengue vaccine nga gitawag og Dengvaxia.
Sa pakighinabi sa SunStar SuperBalita kang Nicole Managbanag, ang provincial information officer, gibutyag niini nga gikumpirma ni Dr. Jerry Calingasan kinsa Provincial Health Officer nga wala nakadawat og mga vaccine ang probinsya.
Gani gibutyag pa sa doktor nga kaniadto dihang giapod-apod kini sa nagkadaiyang rehiyon gibati siya og kadismaya nga wala nalakip ang Misamis Oriental o Northern Mindanao gumikan kay daw unfair kini hilabina pipila ang kaso sa dengue kaniadto.
Apan daw karon nga mibuto kini nga kontrobersya dako kaayong pasalamat sa PHO nga wala natagaan ang probinsya niining maong mga bakuna.
Gani Miyerkules atol sa iyang programa sa radyo ni Governor Yevgeny Vincente Emano, gibutyag niini nga posibleng wala nalakip ang Misamis Oriental kaniadto nga wala nahatagan tungod kay dili sila kapartido sa administrasyon ni Presidente Noynoy Aquino ug gipasalamatan nga wala niabot kim denhi sa probinsya.
Usa sab ka inahan nibutyag sa SunStar SuperBalita nga daw giya sa labaw’ng makagagahom nga wala malakip ang rehiyon.
"Unsa nalang man gud kong atong anak nabakunahan ani nga anti dengue unya nibuto dayon ni nga kontrobersya karon. Mapraning gyod ta mga ginikanan sa paghuna huna unsaon ni," matud ni Daylene Vergara.
"Careful unta sila kay kinabuhi sa atong mga anak ang nakasalalay ani ug sa ngalan nga dako atong salig ani nga buhatan diba maam?" Dugang pa niini.
Kahinumduman gikanselar na karon sa DOH kining dengvaxia human giingong adunay negatibo nga epekto niini sa mga bata nga mabakunahan.