GILUNGKAB sa wala mailang mga suspetsado niadtong milabay nga adlaw ang Post Office 10 nga nahimutang sa Rizal-Chavez Streets, dakbayan sa Cagayan de Oro.
Nadala sa mga wala mailang suspetsado ang mokabat sa P5 mil kapin kon kulang nga salaping cash diin nakasulod kini sa gamay nga box bank nga para unta kini sa ilang umaabot nga Christmas party.
Sa nahipos nga impormasiyon gikan sa buhatan sa kapolisan sa Police Station 1 (PS1) sa Divisoria, gikabutyag nga midangop si Jonathan Labial, postman isip representante sa buhatan nga gipadala sa ilang post master nga si Amor Aguilar aron nga itaho ang panghitabo.
Gikabutyag nga gipugos sa pagguba sa wala mailang mga responsable ang dingding nga bahin ginamit ang martilyo ug sa dihang nakasulod na gikuha matud pa sa mga suspek ang gisudlan sa salaping cash.
Gidugang pa nga ang guwardiya nga si SG Marlon Roxas, kinsa duty niadtong higayona ,ang wala matud pa nasayod sa panghitabo.
Sa pagsulat niini nga balita, ang insidente ang nakatala na sa buhatan sa kapolisan alang sa tukmang disposasiyon.