PORMAL na nga nagpagawas og kamandoan ang Police Regional Office-Northern Mindanao aron sugdan og usab ang giyera kontra druga nga ikasa sa kapulisan.
Si Police Regional Office-Northern Mindanao Director Police Chief Superintendent Timoteo Pacleb niadtong Disyembre 15 lamang nagpagawas og kamandoan sa tanan police station ug uban pang units.
"You are directed to continue anti-illegal drugs campaign/operations in partnership with the community and in coordination with other Law Enforcement Agencies (LEAs) specifically Philippine Drug Enforcement Agency (PDEA) as lead agency," tipik sa kamandoan.
Gimando sab ang mga personahe sa mga operasyon nga imintinar ang data nga resulta sa matag operasyon nga gahimuon matag-adlaw, semana o binulan.
Parte sa senimanang hisgotanan sa National Oversight Committee sa Police Operation ang mga accomplishments nga nahimo sa kapulisan.
Ang kapulisan nanawagan karong panahona sa katawhan nga mokooperar kanila ug i-report ang mga taong namatikdang padayon sa pagpayuhot sa ginadili nga druga.
Kahinumduman moabot sab og tulo ka bulan nga gidid-an ang kapulisan nga mohimo og mga operasyon human naputos sa kontrobersya ang mga operasyon nga gahimuon sa mga pulis hilabina sa kaulohan diin adunay mga batan-on nga napatay sa mga operasyon.