Dalagita 'gilugos', gipatay | SunStar

Dalagita 'gilugos', gipatay

Time to read
1 minute
Read so far

Dalagita 'gilugos', gipatay

Wednesday, January 03, 2018

"CONDOLENCE, who lost me."

Kini ang ulahing post sa dalagita niadtong Disyembre 31, 2017 kinsa napalgang gisulod og sako ug wala nay kinabuhi mga alas 3:30 sa hapon niadtong Enero 2, 2018, sa District 3, San Nicholas, Barangay Puntod ning siyudad sa Cagayan de Oro.

Ngilngig ang kamatayon ni Jeramie S. Lumacang alyas "Sofia," residente sa susamang dapit ug Grade 10 sa Puntod National High School.

Gituohang gimartilyo ug gilugos ang biktima una gisulod sa sako.

Miresponde ang kapulisan human sila makadawat og tawag gikan ni Rodel Zurita, kagawad sa Barangay Puntod, nga adunay patay napalgan nga gisulod sa sako.

Lakip sa miresponde ang Scene of Crimes Operatives (Soco) ug dinhi nasusihan si Lumacang nga gisulod sa sako, adunay samad sa ulo nga gituohang giposposan og martilyo human lakip ang maong gahi nga butang ang nakuha sa crime scene.

Ang patay'ng lawas naka t-shirt lamang ug naka-bra apan wala nay sapot sa ubos nga bahin hinungdan gidudahang gilugos ang biktima usa dayon gipatay.

Nahipos sa Soco gikan sa crime scene ang usa ka martilyo ug ang short pants ug panty sa biktima.

Usa ka suod nga higala ni Lumacang namahayag nga uwahi niyang nahinabi ug nakauban ang biktima niadtong Desiyembre 31 sa buntag hangtod sa alas 7:00 sa gabii.

Apan tulo ka lalaki ang milabay nga mao sila si Mark Sagaad, Eric Polinar ug Erik John Polinar ang daw giubanan ni Sofia paingon sa Agora nga bahin.

"Si Sofia man gyod ang mamugos nga mosabay sa ilaha mao to nakauban," matud sa higala ug nasayran nga nakig-inom kini kuyog kanila sa dapit.

Gani mga alas 10 sa gabii naka-text pa kini kaniya apan wala niya gireplayan tungod kay naulit siya kay gibiyaan siya.

Sugod niadtong gabhiona gikagoul na sa iyang pamilya labina sa iyang inahan nga wala na kini miuli sa ilang puloy-anan.

Sa pagkakaron ang patay'ng lawas gidala na sa Bollosos Funeral Parlor kinsa gikatakdang ipaubos sa otopsiya.

Gi-imbestigahan

Tulo ka mga lalaki ang giimbestigahan karon sa kapulisan nga mao ang mag-agaw nga sila si Eric ug Eric John Polinar ug Mark Sagaad gumikan kay kini mao ang uwahing nakauban sa biktima.

Apan ang inahan ni Mark niingon nga imposibleng mahimo kini sa iyang anak tungod kay giatake man kini sa ulcer ug gibantayan hangtod niadtong Bag-ong Tuig.

Nasayran nga si Sagaad ex-boyfriend ni Lumacang.

Sila sab ni Eric ang nagkauyab ni Lumacang ug kini si Eric John ang giingong mao pa naguyab ni Sofia.

Gipamugos sab ni John nga dili kini nila mahimo tungod kay daw dako iyang respeto kang Lumacang.

Gipasabot sab niini nga uwahing nakauban ni Lumacang si Eric niadtong gabhiona nga lango sa ilimnong makahubog.

Si Senior Police Officer 4 Estrada nibutyag nga ubos pa sa imbestigasyon ang tulo ka suspetsado.

Ang inahan sab ni Lumacang nga mao si Jinky nakahilak nga nangayo og hustisya sa nahitabo sa iyang anak.

Gipatik sa mantalaang Superbalita Cagayan de Oro Enero 04, 2018.

View Comments