HUMAN sa tulo ka tuig diin gibalik sa daan nga dalan ang prosesyon sa Itom nga Nazareno, kini usab ang unang higayon nga aduna’y surpresa ang mga Hijos diin gikanaog sa may flyover sa C.M Recto avenue ug gibaklay lakip na pagsayaw-sayaw niini hangtod na sa Nazareno Church.
Gibutyag ni Wenceslao “Toto” Salcedo, presidente sa Hijos del Nazareno sa pakighinabi sa SunStar Superbalita, nga lakip kato sa plano diin gi-surpresa ang katawhan ug deboto sa dihang gikanaog kini gikan sa karo ug maghudyaka kini sila uban sa Itom nga Nazareno.
Giingong buot matud pa sa kaparian nga mas taas-taas ang ilang pagsayaw ug paghudyaka sa Itom nga Nazareno, hinungdan nga mas layo-layo pa sa simbahan gipakanaog na kini.
"Kadto kabahin gyud to sa plano. Wala mi magsaba sa media, wala mi magsaba sa pulis, pero pag-abot namo sa Mac Arthur, pag tungod tungod namo sa Mac Arthur, ayha pa namo gi-aware ang pulis kay di man sab, maglisod man sab mi’g lihok di mi kagawas mao tong giingnan namo nga duna mi surprise dinhi-a. Mao tong nabakala sila kay abi nila’g maapektohan ang seguridad, ingon ko dili gimik siya nga mosayaw ra mi uban kang Nazareno para makit-an sa tawo unsa ka hudyaka ang kapistahan sa Nazareno," pahayag ni Salcedo.
Gidugang pa niini nga kato matud pa ang unang higayon nga ila katong gihimo sukad sa pag-abot sa Itom nga Nazareno dinhi sa siyudad.
"Sa pag-abot niya dinhi, una gyud to siya nga higayon pero kung moingon kag pagsayaw, permi na namo siya gisayaw," dugang pahayag ni Salcedo.
Nasayran nga karon pa kining tuiga, nabalik sa daan nga dalan ang prosesiyon human usab nga pwedi na matud pa nga magamit ang Cathedral hinungdan nga naggikan kini sa simbahan sa St. Augustine Church hangtod na sa Nazareno Church.
“Gisubay lang sab ni Father Julius ang angayan gyud nga from church to church lang gyud siya. So far, ang amo lang gisubay kung unsay angayan gyud kay kung available lang ang Cathedral saunang panahon, dili gyud mi mobalhin, posible lang madugangan nga rota pero di gyud mi mobalhin,” pahayag ni Salcedo.
Ang 59 anyos usab nga taga Lumbia nga si Serela Tejor uban sa iyang apo ang deboto na gayud sa Itom nga Nazareno ang kanunay usab nga gauban sa prosesyon tungod na usab sa dakong pagtoo niini.
Bisan asa matud pa nga rota, gauban ra kini kay lage usa man kini sa deboto sa Itom nga Nazareno. Gibutyag usab niini nga nakita usab ang kausaban diha sa pamilya human nga namahimong deboto sa Itom nga Nazareno.
“Naa ang mga anak mag sinabtanay sauna mura'g lahi karon. Mura'g close na, atong panginbuhi bisan tuod krisis, maayong lawas mao raman na atong pangayuon,ug buhi pa ta, kaya pa, padayon gihapon,” pahayag ni Tejor.
Samtang mas nakauyon usab ang pipila sa maong prosesyon gumikan na usab kay hapsay ang ilang paminaw.
“Murag mas nakauyon ang Itom nga Nazareno nga diri siya e-agi kay hapsay kaayo dayon maayo kaayo ang panahon,” pahayag sa usa sa mga deboto.
Gibutyag usab ni Salcedo nga alang kaniya, bisan asa usab nga dalan o ang prosesyon okay ra kini kaniya.
“Sa akong kabahin, wala man gyud ko. Kung asa na ruta, mosunod raman gyud ko. Mas okay karon,” dugang pahayag ni Salcedo.
Nagpasalamaton usab kini sila gumikan kay malinawon ug nagmalampuson ang maong kasaulogan diin wala’y mga natalang mga insidente atol sa maong dakong kalihokan sa simbahan.