Pagpagawas sa hulagway sa saksi gisaway | SunStar

Pagpagawas sa hulagway sa saksi gisaway

Time to read
1 minute
Read so far

Pagpagawas sa hulagway sa saksi gisaway

Sunday, January 14, 2018

DAGHAN ang nabalaka ug nagpangutana kung nganong gipagawas sa kapulisan ang facial composite sketch sa posible nga saksi sa pagpatay kay Dr. Ricardo Rotoras.

Nasayran nga gipagawas sa kapulisan atol sa press briefing ilabi na sa (Special Investigation Task Group) SITG Rotoras ug gipakita sa media ang hulagway sa posibleng saksi sa krimen ilabi na sa pagpatay ni Dr. Ricardo Rotoras, presidente sa University of Science and Technology Southern Philippines (USTP).

Gibutyag ni Police Chief Inspector Mardy Hortillosa, tigpamaba sa Cagayan de Oro Police Office (Cocpo), nga ilang gipagawas ang hulagway bisan pa man og nakadawat kini sila og mga pagsaway.

Pinaagi matud pa sa social media, nanghinaot sila nga mopatim-aw ang saksi aron makuhaan og pahayag aron nga mapadali sa pagsulbad ang kaso ug alang na usab sa seguridad niini.

“Busa gipakita nato ni para makatabang sa kaso ug makuhaan nato og statement.Wala ta kabalo sa identity busa through sa social media basin matabangan ta. Sigurado mi nga wala nakabalo ang mga suspek ana,” pahayag ni Hortillosa.

“May be some of the people will criticize this action but it will help a lot on the solution of the case. SITG is convinced that she was not identified by the gunman but if she was, the better thing she must do is to seek the help of SITG (Mahimo nga ang pipila sa mga tawo mosaway niining maong aksyon apan kini makatabang sa usa ka solusyon sa kasulbaran sa maong kaso.

Kombinsido ang SITG nga wala siya nailhan sa Gunman apan kung nailhan man siya, ang mas maayo nga butang nga kinahanglan niyang buhaton mao ang pagpangayo sa tabang sa SITG)” dugang pahayag sa page sa Cocpo Police Community Relations Unit.

Giklaro usab niini nga nahimo ang sketch tungod na usab kay aduna kini sila’y nakuhang laing witness apan dili nila mamahimong mabutyag tungod na usab sa seguridad niini.

Nasayran nga pipila sa mga katawhan ug bisan mga media ang nikumento sa aksiyon nga gihimo sa mga otoridad ilabi na sa pagpagawas sa hulagway sa maong nakasaksi.

Gisulayan sa pagkuha sa SunStar SuperBalita ang tigpamaba sa Cocpo kalabot na usab niini apan wala kini tubag sa pagsulat niini nga balita.

Nasayran nga anaa na matud pa sa 70 porsyento ang kapolisan sa pagsulbad diha sa kasong pagpatay sa USTP President nga si Dr. Rotoras diha mismo sa atbang sa ilang panimalay niadtong bulan sa Disyembre sa milabay nga tuig.

Gikalipay usab sa pamilya sa gipatay nga biktima human nga nasikop ang usa ka architect nga si Rey Galua niadtong milabay nga adlaw kinsa gi-anunsiyo na nga usa kini ka persons of interest.

Karong panahona, padayon pa ang pagpangita sa hustisya ang kapulisan ilabi na ang pamilya sa namatay nga biktima.

Gipatik sa mantalaang Superbalita Cagayan de Oro Enero 14, 2018.

View Comments