KASUPAKAN sa Republic Act 9165 kon Dangerous Drugs Act ang giatubang karon sa driver sa ambulansya nga nadakpan sa drug bust niaging adlaw sa Barra, lungsod sa Opol, Misamis Oriental.
Giila ang dinakpan nga si Anselmo Pandan alyas Aicee, nagtrabaho isip driver sa ambulansya sa Opol Municipal Health Office.
Si Pandan giingong anaa sa ikatulo nga high-value target sa Philippine Drug Enforcement Agency (PDEA)-Northern Mindanao ug ika no. 9 nga target sa National Bureau of Investigation (NBI).
Ang operasyon gikasa sa kapulisan sa Opol Police Station sa pagpangulo ni Police Senior Inspector Dennis Rowell Flores, mga elemento sa PDEA ug NBI pangulohan ni Atty. Sally Hans Barbaso.
Nakuha atol sa operasyon ang tulo ka pakete sa nagkalain-laing kadagko sa sachet nga adunay gibug-aton nga 10 gramo nga adunay gibana-banang kantidad nga P70,000.
Ang mga nakumpiskang ebidensya ang gidala na sa Regional Laboratory Office sa buhatan sa PDEA.
Niadtong adlaw’ng Biyernes, pormal na nga gipasakaan og kaso ang dinakpan kinsa hugot nga mihimakak sa iyang kalambigitan. (SVB)