GIBUTYAG ni Misamis Oriental Governor Yevgeny Vincente Emano nga dili siya susama sa baki nga gaambak-gaambak sa partido.
Kini iyang tubag sa pangutana kon wala ba kini plano molakip sa partido nga PDP-Laban nga mao ang kasamtangan partido ni Presidente Rodrigo Duterte.
Matud ni Emano nga pabilin siya karong panahona nga mobarog sa iyang partido nga mao ang Padayon Pilipino.
Dugang ni Emano nga gitudloan siya og maayong pamatasan sa iyang amahan nga si kanhi mayor Vicente Emano nga dili magbalhin balhin og partido tungod kay madaot ang pagsalig sa katawhan ug gawas niini ug matawag nga oportunista.
Migawas ang report nga mobalhin og partido si Cagayan de Oro City Mayor Oscar Moreno uban nila ni Bise Mayor Rainer Uy ug Congressman Klarex Uy ngadto sa partido ni Duterte nga gikatakdang manumpa karon lang bulana.
"Nagtoo ko nga kanang pagpanumpa nila para pagpalig-on sa ilang pultikanhong kalihokan nga tan-aw ko ilang katungod," matud ni Emano.
Dugang niya nga kon daw kaniadto gatawgon kini og "bakbak" tungod sa pagbalhin-balhin og partido, karon gitawag nila kining "rainbow" tungod kay nagkalain-laing kolor na sa pulitikanhong partido ang giubanan niini.
Dugang ni Emano nga daw political comfort lamang ang gilantaw sa kampo ni Moreno gumikan daw maproteksyonan kini sa gipang-atubang nga kaso.
Una na nga namahayag si City Councilor Enrico Salcedo, kinsa lakip sa giingong mobalhin sa PDP-Laban kauban ang mayor, nga walay problema kon mobalhin siya og partido gumikan kay wala silay bikil sa partido. (SVB)