MOKABAT sa 98 ka mga personahe sakop sa Police Regional Office-Northern Mindanao ang gihatagan og special nga promosyon tungod sa ilang mga kaisog ug maayong nahimo nga angayan himuong ehemplo sa uban pulis.
Pinaagi sa special promotion order nga gipirmahan ni Philippine National Police (PNP) Chief Ronald Bato dela Rosa ang 98 ka mga pulis gikan sa rehiyon uban ang laing 655 ka pulis gikan sa lain-laing rehiyon sa nasod ang gipasidunggan.
Giaprobahan niini ang promosyon sa 90 ka mga sakop sa Joint Task Group denhi sa Rehiyon tungod sa ilang pakigbatok sa mga terorista sa Marawi City.
Special promotion sab ang gihatag sa PNP sa walo ka mga polis sa Binuangan Police Station tungod kay ilang naprotektahan ang ilang police station dihang gisulong sa mokabat 200 ka mga sakop sa New People’s Army niadtong Disyembre 3, 2017.
Nipaabot sa iyang dakong pahalipay si PRO-Northern Mindanao Director Police Chief Superintendent Timoteo Pacleb ug miingon nga unta ipadayon ang kaisog nga haom sa gipanumpaan sa kapulisan aron maprotektahan ang palibot, katawhan ug lakip na ilang kaugalingon.