NAGSILBING host ang kagamhanan sa probinsya sa Misamis Oriental sa unang adlaw dungan sa Governor's Night sa ika-12th Mindanao Geographical Conference of the Philippine Association of Local Government Accountants (Phalga) nga gisugdan Miyerkules, Pebrero 21.
Apan ang kalihokan molangtod pa ngadto sa Pebrero 23 sa Limketkai Atrium, dakbayan sa Cagayan de Oro.
Gikalipay og dako ni Governor Yevgeny Emano nga nahimong host sa kalihokan sa mga accountant atol Governor's Night tungod kay nahatagan og higayon nga ma-promote ang Misamis Oriental ngadto sa 3,000 ka mga delegado gikan sa nagkalain-laing lugar sa tibuok Mindanao.
Usa sab si Emano sa resource speakers niining conference diin hisgotan niini ang maayong praktis ug ingon man maayong pagdumala sa Misamis Oriental.
Matud ni Emano atol sa iyang speech nga lima ka tuig gikan sa iyang pagserbisyo ang best practices nga iyang nahimo mao ang walay record sa daw pagpangawkaw.
Anaa sab ang presensya ni Senator Juan Edgardo “Sonny” Angara ug ingon man ni 1999 Miss Universe first runner up ug TV host nga si Miriam Quiambao kinsa nagsilbi gihapon nga resource speakers sa event.
Si Misamis Oriental Provincial accountant Marilou Rivera nibutyag nga dako kaayo kini nga kalihokan sa Misamis Oriental ug Cagayan de Oro tungod kay modala sab kini og dakong ekonomiya sa dakbayan ug probinsya.
Dugang niini nga pinaagi sab niining dakong kalihokan mapasigarbo ug mapakita ngadto sa mga delegado kung unsa ka maayo ang Misamis Oriental kon hisgotan ang maayong pagdumala niini o good governance nga adunay taas nga standard diha sa serbisyo publiko.
Gawas niini mapasigarbo ang turismo sa tibouk Mindanao ug ingon man ngadto sa nagkalain laing dapit.
Ang tema niining kalihokan mao ang “LGU Fiscal Managers: Responsible Stewards of Public Resources” diin partisipante niini mao ang local government accountants, accounting staffs, members of the local finance committees, punong barangays, barangay treasurers and appropriations Committee chairperson. (SVB)