TIKLO ang usa ka menor de edad samtang naka-ikyas ang kauban niini human nakiggukod sa kapolisan sa Velez-Gaerlan streets, dakbayan sa Cagayan de Oro.
Sikop si Alyas Wawang, 16 ug residente sa Barangay Kauswagan samtang ang nakasibat nga kauban nailang si alyas Janix o Opaw.
Sa pakighinabi sa SunStar SuperBalita kang Wawang gibutyag niini nga gipugos lang siya ni Janix nga ipabitbit kaniya ang kinawat nga battery ug gani giti-onan matud pa kini og kutsilyo.
Nasapon sa duha ka kapulisan sa Tactical Motorized Rider (TMR) nga sila si PO2 Dean Dubal ug PO1 Ferdie Uba kinsa duty niadtong higayona sa nahisgutang dapit diin nagbitbit ang duha ka mga menor de edad.
Gisulayan kini sa pag kumpronta sa kapulisan apan nikaratil ug dagan ang duruha hinungdan sa nilakagay ug nasapon kini sa Paseo del Rio apan nakatakas ang usa niini.
Gipanag-iyahan ni Rogen Canillo,35, minyo nga taga Molugan El Salvador, human nga giparada ang sakyanan pinaagi sa pagguba sa kadina bisan nga adlawan nga dako.
Nasayran usab nga ubay-ubay na ang nagpatala kalabot na sa susamang panghitabo diin nangawatan og battery sa sakyanan.
Samtang nasikop ang mga manglabnihay diin usa niini nag edad usab og 16 anyos ug ang kauban nailang si Lawrence Robiato, 20, ulitawo nga taga Vamenta Boulevard, Carmen.
Nasayran nga nakiglakag usab ang duruha sa mga nirespondeng kapolisan diha sa may Yacapin-Corrales streets ug malampuson nga nasikop si Robiato diha sa Sumo Divisoria area, Capistrano street samtang ang menor de edad nasikop sa Yacapin-Velez streets.
Narekober usab ang gilabning cellular phone sa mga suspetsado atol sa pagkasikop niini.
Sa pagsulat niini nga balita kasamtangang anaa sa kustodiya sa kapolisan sa Police Station 1 (PS1) sa Divisoria ang nahisgutang suspetsadong menor de edad ug anaa usab sa buhatan sa PS2 sa Cogon ang laing nasikop nga mga nanglabni.