MOABOT sa 913 ka mga establismento ang gikonsidera sa Bureau of Fire Protection (BFP) nga fire hazard sa dakbayan sa Cagayan de Oro.
Gibutyag ni City Fire Marshall Superintendent Richard Arbutante sa BFP Cagayan de Oro nga kining maong mga gambalay ang wala mituman sa mga mandato sa BFP.
Nagkalain-lain sab nga degree ang ilang kakulangon ug tungod kay pag-abot sa fourth quarter nga wala pa gihapon nila nakumpleto ang mga mandato ug hangyo sa BFP nga alang sa seguridad sa ilang mga establismento.
Ila na dayon kining giduso sa Business Processing and Licensing Office (BPLO) aron maoy mabasihan kon angayan pa ba i-renew ang ilang mga mga business permit ug aron sab mapahimangnoan silang kinahanglan sundon ang mga gabayan sa BFP.
Hangtod karon labina ning kasaulogan sa Fire Prevention Month padayon ang panawagan sa buhatan nga magbinantayon ang mga establismento, mga gambalay labina sa sobrang kainit sa panahon nga gakasinatian karong panahona nga basin unya maghinungdan sa sunog. (SVB)