GIPLANO ang katukoran sa Planetarium Observatory sa dakbayan sa El Salvador, Misamis Oriental.
Apan gibutyag ni Misamis Oriental Governor Yevgeny Vincente Emano nga nitukod siya og technical team aron mosuta sa mga isyung giatubang nga nakalangan sa katukoran niini.
Sa miaging semana, nibisita si Emano ang mga personahe sa Department of Science and Technology-Philippine Atmospheric Geophysical and Astronomical Services Administration sa Northern Mindanao nga gilangkoban nila ni weather specialist Mario Guya ug mga kauban aron hisgotan ang planong katukoran niini ug mihangyo kang Emano nga matuman kini sa labing daling panahon.
Nasayran nga ang Pagasa nigahin na og pundo nga P50 milyon alang sa katukoran niini ug itapad sa buhatan sa Pagasa nga adunay gilapdan nga tunga sa ektarya apan adunay pipila ka isyu sa dapit rason nalangan ang pagtukod niini sama sa giingong adunay mga maapektuhang residente.
Gikinahanglan kining hatagan og pagtagad ug gilauman sa PAG-ASA nga mopataliwala ang gobernador.
Mipasalig si Emano nga lantawon kini nga isyu sa iyang mga sakop aron mahatagan og katumanan ang katukuran sa planetarium observatory nga gitakdang nag-inusarang makita lamang sa Mindanao.
Gipasabot ni Emano nganong uyon siya sa pagtukod niini tungod kay dako kini og tabang sa edukasyon sa mga kabataan nga dili na sila kinahanglan molangyaw pa sa kaulohan aron mobisita sa National Planetarium kay matukod naman kini sa Misamis Oriental.
Gawas niini, gibutyag usab ni Emano nga makadugang kini sa ekonomiya sa dakbayan sa El Salvador ug laing turismo sa Misamis Oriental.
Nakasiguro kini nga dagsaon kini sa kabataan, kabatan-onan ug katigulangan kay walay pili ang bisan kinsa nga mosulod niini ug buot mosaksi sa nindot nga palibot.
Gawas pa nga kon adunay mga educational tour ang mga tinun-an gikan sa laing rehiyon sa Mindanao, siguradong hapiton ang planetarium sa El Salvador kay nag-inusara lamang kini sa Mindanao.
Ang planetarium usa ka dako nga teatro nga mopresenta ug mo-edukar kalabot sa astronomy, magpakita sa panganod sa kagabhion, planeta, canstellation, ug uban pa nga mga celestial object diin masaksihan kini pinaagi sa projection screen sulod sa teatro. (SVB)