GIGAMITAN og bomba sa tubig ang usa ka lolo nga nag-amok ug nagwara-wara sa dala niining sundang sa merkado sa Opol, Misamis Oriental.
Ang maong lolo naila nga si Berto ug gibana-banang anaa sa mga 60 kapin nga pangidaron ug giingong aduna usab kini deperensiya sa pangisip.
Kasamtangang anaa kini sa mini-cell sa Opol Municipal Station.
Si Berto nagpaila nga “Obama Trump” ang iyang kompleto nga pangalan.
Nasayran nga nakadawat og taho ang kapulisan gikan sa mga vendors ug driver Huwebes kalabot sa usa ka lalaki nga nag-amok, hinungdan nga dali kining girespondehan sa kapulisan apan gisulayan kini og tigbas mao nga nanawag kini og back-up.
“Naa kuno lage tawo, laki nagdala-dalag sundang, gani abi lang nato ordinary lang magdala kay lage usually pwedi ra man na atong badlungon gi attempt og badlong, sus gi-aksiyon naman niya og tigbas so nagpatawag og back up ang akong pulis,” pahayag ni Police Senior Inspector Dennis Ruel Flores, ang officer-in-charge sa estasiyon.
Gidugang pa nga posibleng aduna gayud kini deperensiya sa panghuna-huna kay lage kung pangutan-on, ngalan man sa duha ka mga iladong presidente sa United States ang gipa-ila niini, hinungdan nga nagpakitabang na kini sa marshal sa fire department sa Opol.
“Interviewhon og kinsa siya, moingon man pud siya og Obama, Obama kuno iyang apilyedo, iyang first name Trump, wan-a gyud ning tawhana,” pahayag ni Flores.
“Nagpatabang gyud ta sa atong fire marshal diri sa fire department sa Opol kay atong gibansay-bansay gyud kay ato lage e-preserve gyud ang life aning usa ka laki, so nagpatabang ta nila pinaagi bitaw sa ilang bomba sa tubig, hoping nga ma paralyze siya ug matumba sa iyang gitindogan aron diretso nga atong malayog bitaw atong makuha mailog nato iyang sundang” dugang pahayag ni Flores.
Giklaro usab niini nga dili hostage taking ang nahitabo, apan pag-amok lamang, kinsa gituohang aduna’y deperensiya sa pangisip.
“Dili hostage taking ang nahitabo, usa lang ni ka pag amok sa isa ka tawo nga gituohan pud. Accordingly, naa’y nagpaila nga apo niya unya accordingly si Berto ni, unya niagi kuno nig ka pasmo na,” dugang pa niini.
Giingong taod-taod pa kini ayha nasikop human usab nga bisan gipasiritan na og tubig gawara-wara gihapon kini sa iyang dala nga taas nga sundang.
Sa pagkakaron ang maong suspek kasamtangang anaa na sa kapolisan ug gitakdang pasakaan og kasong alarm and scandal.