Comelec gun ban nahuman na

MATAPOS na karong adlawa ang Commission on Elections (Comelec) gun ban ug mokabat 48 ka mga tawo ang nasikop ning Rehiyon 10 gikan sa pagsugod sa pagpatuman sa gun ban.

Gibutyag ni Philippine National Police Region Office 10 Police Chief Inspector Regina Abanalez sa Sun.Star SuperBalita nga kagahapong adlawa mga alas 12:00 sa tungang gabii natapos ang 45 ka adlaw nga Comelec gun ban.

Ang Comelec nipatuman sa gun ban gikan sa September 25 hangtod kagahapong adlawa ug ning Rehiyon 10 mokabat ngadto sa 48 ka mga tawo ang nakasupak niini.

Moabot sa 22 ka mga violators ang nasikop sa siyudad sa Cagayan de Oro; 6 sa siyudad sa Iligan; 5 sa Misamis Oriental; 8 sa Bukidnon; 4 sa Misamis Occidental; ug 3 sa Lanao del Sur.

Samtang padayon ang kapolisan sa paghimo og checkpoint sa kadalanan nga miresulta sa pagkasikop sa 48 ka mga tawo nga napasakaan na og kaso.

Human niining gun ban, mahimo na nga magdala ang mga gun holder og armas kung kini adunay mga permit.

Nasayran nga mokabat 920 ka mga tawo ang nakasupak sa gun ban sa tibuok nasod. (SVB)