Lalaki nabangga, patay

NAKABSAN sa kinabuhi ang usa ka lalaki human nabangga ang gimanehong motorsiklo niadtong Miyerkules mga alas 11:00 sa buntag didto sa siyudad sa Gingoog, Misamis Oriental.

Giila ang namatay nga mao si Frank Salingay, 52, balo, residente sa Barangay 20, sa susamang siyudad.

Gibutyag sa paryente sa biktima nga sa crossing nga bahin nabangga ang gimanehong motorsiklo niini dihang laing motor usab ang misungag.

Si Salingay ang sobrang naapektuhan tungod kay nilagpot man kini ug grabeng samad nga naangkon niini sa lawas.

Gidala sa duol nga balay tambalanan ang biktima apan giduso sa Northern Mindanao Medical Center (NMMC) ning siyudad sa Cagayan de Oro.

Kritikal ug nagginhawa pa ang biktima nga anaa sa emergency room apan pipila ka oras sulod sa balay tambalanan nakabsan kini sa iyang kinabuhi.

Samtang laing ulitawo nga mao si James Grado, 24, taga Bonbon ning siyudad ang kritikal ang kahimtang sa susamang tambalanan human nabangga gihapon ang motorsiklo niini sa punoan sa kahoy sa Bulua nga bahin ning siyudad.

Ubay-ubay nga samad ug bun-og sa kalawasan ang naangkon sa biktima gawas pa sa kamot ug tiil nga bahin nabali niini.

Gidala sa kapolisan sa Police Station 7 (PS7) sa Bulua ang biktima sa NMMC ug padayon pa nga giobserbahan sa mga doctor ning panahona. (Stephanie V. Berganio)