DUMOT ang usa sa anggulong gitutokan sa kapolisan kalabot sa pagpusil patay sa usa ka empliyado sa PhilHealth sa Northern Mindanao niadtong Martes.
Ang insidente nahitabo mga alas 6:30 sa gabii sa dalan Ramon Chavez-Aguinaldo St., ning siyudad sa Cagayan de Oro.
Dead on arrival sa Northern Mindanao Medical Center si Alingcol
Capampangan-Alonto, 41, minyo, residente sa #242 Sto. Niño, Lapasan ning siyudad, usa ka Market Specialist sa PhilHealth ug lumad nga taga Lanao del Sur ang pamilya sa biktima.
Ang mirespondeng polis sa Police Station 2 sa Cogon nga nahinabi sa Sun.Star SuperBalita niingon nga "rido" ang usa sa motibo nga gitutokan sa pagpatay sa biktima.
Nasayran nga aduna kini gipasakaan og kaso sa Lanao del Sur tungod sa away politika, hinuon padayon pa kining gikumpirmar.
Gani ang mga kauban niini sa trabaho niingon nga walay problema sa batasan niini kung ang relasyon niini sa trabaho ang hisgutan tungod kay buotan kini ug sayon kaayong duolon.
Ang mga silingan sa biktima nipaaabot nga kung adunay silay mga mulo kalabot sa Philhealth, kini ang mopaabot sa ilang problema hinungdan nga kwestyonable alang kanila ang maong hitabo.
Si Alonto paingon na nga mouli sa iyang puloy-anan niadtong gabhiona sakay sa iyang motorsiklo nga nagdala og plaka KG 4924 ug paghidangat sa dalan Chavez-Aguinaldo, kalit lang nga gisundan sa usa ka kolor pula nga motorsiklo sakay ang duha ka wala mailang mga lalaki ug gisabayan ang biktima.
Deretsong gipusil ang kilid nga bahin sa ulo niini ug milapos sa dalunnggan.
Nagbuy-od ang biktima sa kalsada samtang ang motorsiklo nga gisakyan sa mga suspetsado wala na mi-andar hinungdan nga ila na lang kining gibiyaan ug nag-iyahay og panagan.
Sa pikas kanto, nakita sa mga nakasaksi nga adunay naghulat kanila nga laing motorsiklo ug maoy gisakyan sa mga suspetsado.
Ang kapitan sa Barangay 30 mismo ang nidala sa biktima sa NMMC apan dead on arrival nga gideklarar sa doctor.
Dihang miresponde ang mga sakop sa Scene of Crimes Operatives, nahipos ang basyo sa kalibre .45, helmet ug ang giabandona nga motorsiklo nga nagdala sa plaka 4438UV nga nasayran nga narehistro sa Manila ug kasamtangan pa nga gi-verify ang tag-iya niini.
Nagduda ang kapolisan nga gikarnap ra usab ang maong motorsiklo hinuon padayon pang gisuta. (Stephanie V. Berganio)