No. 2 sa target list tiklo

NASIKOP sa mga sakop sa Philippine Drug Enforcement Agency (PDEA) sa Northern Mindanao ang ikaduha sa target list sa mga drug personality.

Nagtingkagol sa prisuhan si Danilo Macapayag, 46, minyo, residente sa Justo Ramonal Village, Camaman-an ning siyudad sa Cagayan de Oro.

Lakip sa nangasikop mao sila si Fermiliano Yanez, 63, minyo, taga Iponan, ning siyudad ug Kenneth Taylor, minyo, 43, taga Upper Carmen ning siyudad.

Ang maong mga suspetsado naaresto human namaligya og usa ka gamay'ng plastik nga adunay sulod nga gituohang shabu ngadto sa usa ka PDEA undercover Agent.

Narekober sa ilang posisyon ang 30 ka buok nga mga elongated medium size plastic sachets nga adunay sulod sa gituohang shabu, usa ka gamay nga plastic sachet, usa ka sachet usab nga adunay marijuana fruity tops, lima ka pakete nga adunay shabu residue, duha ka mga strips sa aluminum foil, usa ka improvised tooter, upat ka mga disposable lighters uban sa dagom, siyam ka improvised foil tooter, unom ka aluminum foil ug usa ka nilikit nga aluminum foil.

Si Juliet Caga-anan, kinsa information Officer sa PDEA, nibutyag sa Sun.Star SuperBalita nga taod-taod na nga gisunod si Macapayag gani nidumili pa kini sa pag-uban atol sa operasyon ug hugot nga nanghimakak sa alegasyon.

Nasayran nga giingong dealer sa ilegal nga druga di Macapayag samtang gikatahong mamaligyaay ang laing duha.

Kasamtangan gihimoan og drug testing ang tulo ka mga nasikop samtang natigayong pasakaan og kaso kagahapong adlawa human misupak sa balaod ubos sa Republic Act 9165.

Ang ubay-ubay nga mga illegal paraphernalia ang natigayong dalhon sa Police Crime Laboratory alang sa masusing eksamin. (SVB)