Post office gilamoy sa kalayo

Thursday, January 6, 2011

WALAY trabaho ug nahunong ang kasamtangan nga operasyon sa post office human kini gilamoy sa kalayo kagahapon mga alas 12:30 sa kadlawon sa dalan Rizal St., Barangay 04, ning siyudad sa Cagayan de Oro.

Si Fire Officer 1 Gil Milloria sa investigation unit sa Bureau of Fire Protection (BFP) nibutyag sa Sun.Star Superbalita nga nabilin pa ang estraktura sa maong establismento apan naugdaw na ang sulod niini.

Have something to report? Tell us in text, photos or videos.

Naapil sa pagkasunog ang second floor nga bahin nga gipanag-iyahan sa Department of Telecommunication human nagikan sa buhatan sa Philippine Postal Corp ang kalayo.

Matud ni Milloria nga nagsugod ang kalayo sa teller no. 7 ug nikaylap sa ubang mga lawak.

Ang nakalabay niadtong tungora na lamang ang nitawag ug nagpatabang sa BFP hinungdan nga daling girespondihan ang maong hitabo.

Apil sa miresponde ang mga Chinese volunteer nga anaa kanunay mohatag og suporta labina kung adunay mga sunog nga matigayon sa siyudad.

Sa structural nga bahin nagbilin og danyos ang sunog og mokabat P500 mil samtang padayon pa nga gisuta kung pila ang mga kantidad sa mga nasunog nga mga kabtangan.

Gituohang apil sa nasunog ang mga pending nga mga sulat o mga package nga natigayong ipanghatod kahagapon sa buntag.

Gituohang faulty electrical wirings ang hinungdan sa pag-ulbo sa kalayo hinuon padayon pa ang imbestigasyon kalabot niini. (Stephanie V. Berganio)