'Sunog nga lawas naggakos'

NAPALGAN nga nanggikagos ang mga sunog nga lawas sa biktima ug wala nay kinabuhi human niulbo ang kalayo sa SP Foods and Groceries sa merkado sa Puerto ning dakbayan sa Cagayan de Oro mga alas 2:25 sa kaadlawon niadtong Sabado.

Gituohan nga walay insakto nga fire exit ang maong building, hinungdan sa kadaghan sa nakalas nga kinabuhi.

Si SFO2 Rosalito Caratao, chief investigator sa Bureau of Fire Protection (BFP) nga nahinabi sa Sun.Star SuperBalita, niingon nga ang maong sunog ang labing dako ning bulan sa Nobiyembre.

Mokabat 12 ka mga okupante ang anaa sa maong dapit diin lima niini ang nakalingkawas sa kalayo samtang walo ang na-trap ug nakabsan sa ilang kinabuhi.

Pulos stay-in ug empliyado sa SP Foods and Groceries ang mga biktima nga mao sila si Luz Pana, ang manager sa maong tindahan, Emilyn Chong, Chembelyn Macuse, Jaquelyn Resurreccion, Cherly Tontogo, Benjie Taneo ug Lorena Pahunang, kinsa pito ka bulan nga mabdos.

Samtang duha ka mga babayeng empliyado nga mao sila si Churada Tortogo ug Mariane Ponce ang mibuak sa samin nga bintana dihang nakabantay sa kalayo ug nangambak.

Sila usab ni Raymark Janolino, Paul Mark Janolino ug Alvin Concon ang mitabang pagguba sa grills sa bintana sa likod nga bahin sa second floor ug dali nga nangambak.

Giingong maglisod usab sa paggawas ang mga biktima tungod kay firewall ang ibabaw nga bahin.

Si FO1 Gill Millori nidugang paghatag og impormasyon sa Sun.Star SuperBalita nga dunay kalisud ang pagresponde sa lugar tungod kay naka-lock ang tanang pultahan, gawas ug sulod.

Dihang naabri sa mga bombero ang pultahan, nakita na lang ang patay'ng lawas ni Pana ug Taneo kinsa gidudahang naningkamot nga maabri ang pultahan aron makagawas.

Nagsugod ang kalayo sa second floor nga bahin sa tindahan ug mipaingon sa third floor, diin nahimutang ang mga emlipyado.

Gituohan sa mga bombero nga faulty electrical wiring ang hinungdan pag-ulbo sa kalayo.

Sa third floor nga bahin, nakita usab ang napaig nga mga lawas sa unom ka mga empliyado nga nagtapok ug nag-gaksanay.

Gawas sa kainit, na-suffocate usab sa aso ang mga biktima nga maoy labing hinungdan sa ilang kamatayon.

Mokabat ngadto sa duha ka mga oras ang pakigbugno sa kalayo una gideklarang fire-out. Lima ka door nga sakop sa maong commercial building ang gipanag-iyahan ni Elsa Pana, igsuon sa namatay nga si Luz ang naugdaw ug nagbilin sa P1 milyones nga danyos.

Apan padayon pa gihapon nga giimbestigahan ang hinungdan sa sunog ug ingon man walay foul play sa insidente.

Ang lima ka empliyadong nakalingkawas anaa pa karon nagpabilin sa Sabal Community Hospital sa Puerto ug padayon giobserbahan sa mga doktor.

Ang BFP hugot nga nanawagan sa publiko ingon man sa mga nanag-iya sa mga establismento nga dili gyod kalimtan ang fire exit sa lugar, kung mahimo dili na magbutang ug mga grill sa bintana tungod kay ang insidente leksyon kaayo alang sa mga nanag-iya ug mga establismento. (Stephanie V. Berganio)