KASAMTANGAN nga nagtingkagol sa Misamis Oriental Provincial Jail (MOPJ) ang supetsado pagpatay sa Barangay Kapitan sa Hinigdaan lungsod sa Elsalvador Misamis Oriental.
Human sa usa ka adlaw nga pagtago buluntaryong mitahan sa Cagayan de Oro City Police Office (Cocpo) ang suspetsado nga mao si Jerry Rances, 29, residente sa susamang dapit.
Si PC/Insp. Willie Rabuya, hepe sa El Salvador Police Station nibutyag sa Sun.Star Superbalita nga human mitahan sa Cocpo si Rances deretso kining gi-inquest.
Lakip nga pasakaan og kaso ang laing lima ka mga kauban ni Rances nga maoy gitudlong mipusil patay kang Kapitan Rey L. Dadang, 51, niadtong Martes.
Si Dadang ang napiling bag-ong kapitan sa maong barangay.
"Wala na nato gibalik sa El Salvador kay human pag-inquest gideretso na siya sa MOPJ, ang laing lima ka suspek gipangita pa," ni Rabuya.
Nasayran nga mga alas 10:00 sa buntag niadtong adlawng Huwebes mitahan si Rances uban sa iyang abogado pinaagi sa pagkontak kang Police Superintendent Antonio Montalba, kinsa Deputy director sa Cocpo.
Gihingusgan ni Rances nga self defense ang iyang gihimong pagpatay sa kapitan.
"Siya man ang nisulong sa among balay nga nagdala og armas, pag-aksiyon niya og hulbot giunhan nalang nako pagpusil sa sumpak nga shotgun ang bala," matud ni Rances sa interbyu sa Sun.Star Cagayan de Oro.
Gisaysay niini nga human sa pagpamusil kang Dadang makaduha ka higayon sa iyang homemade firearms iyang gikuha ang pusil ni Dadang ug maoy gitiwas pagpusil sa biktima.
Gani sa wala pa nagtago-tago iyang gipahibalo ang asawa sa biktima nga kuhaon na ang patayng lawas niini.
Sakay ang suspek sa iyang motorsiko paingon sa Malitbog, Bukidnon.
Samtang anaa sa Malitbog nagdesisyon nga mosurender na lamang.
"Magtago-tago ra gihapon ko mao nagpatabang ko sa akong kaila nga abogado ug nianhi dayon mi sa Maharlika."
Ning panahona padayon pa nga gipangita ang lima ka mga kauban niini sa pagpamusil samtang gidugang ni Rabuya nga walay laing angulo ilang gitutukan gawas sa personal nga panag-away sa pamilya. (SVB uban sa taho ni ALR)